Индигиир өрүскэ алта суудуна мууска хаайтарда

Абый улууһугар Индигиир өрүскэ алта суудуна мууска хаайтарда. Ол иһигэр 10 киһилээх икки буксир баар. Бу туһунан СӨ Быыһыыр сулууспата иһитиннэрдэ.

Бэҕэһээ, бэс ыйын 1 күнүгэр, быыһааччылар уонна ЫБММ исписэлиистэрэ Хабаровскайдааҕы авиационнай-быыһыыр киинтэн Ми-8МТВ бөртөлүөтүнэн көппүттэрэ. Кинилэр соруктара — муус барыытыгар устубут суудуналары көрдөөһүн.

Көрүү түмүгэр быыһааччылар маннык балаһыанньаны быһаардылар: Индигирка төрдүттэн 518 км тэйиччи, куттал суох сиригэр, икки баржа («М-34» уонна «МН-2301») уонна «Николай Тюменев», «Обь» диэн буксирдар тураллар. Бу икки буксирга барыта 10 киһи баар. Өрүс төрдүттэн 524 км тэйиччи, Белай Гора сэлиэнньэтиттэн аллараа өссө икки суудунаны — лихтер 2000 уонна М-28 баржа — булуллубуттар.

СӨ Быыһыыр сулууспатыгар чопчулаабыттарынан, бүгүн бу алта суудунаны босхолуур үлэлэр былааннаналлар.