Интэриниэт нөҥүө билсиһии содула…

Алдан улууһун икки олохтооҕо кибер-түөкүттэри кытта кэпсэтэн баран мөлүйүөнүнэн солкуобайы сүтэрдилэр.

ИДьМ Алдан улууһунааҕы отделениета суруйарынан, 40 саастаах олохтоох дьахтар билсиһэр сыһыарыыга регистрацияламмыт уонна биир ый кэриҥэ эр киһилиин суруйсубут. Ол киһи криптовалютанан эргинэрин, араас суумалаах харчыны эргинэн,массыына уонна дьиэ атыыласпытын туһунан кэпсээбит.

Дьахтар маннык харчы өлөрөр ньыманы боруобалаан көрүөн баҕарбыт. «Трейдер» көмөтүнэн кини онлайн-биржа сыһыарыытын туруоруммут,  онно регистрацияны ааспыт уонна трейдер эппит счетугар бастакы 21 500 солкуобайы ыыппыт. Ыам уонна бэс ыйдарын устата дьахтар сымыйа трейдер эппит араас баан счеттарыгар харчытын ыыта турбут. Уопсайа 4,6 мөл. тахса солкуобайы «инвестициялаан» баран, кини туох да барыһы ылбатах.

Оттон 35 саастаах электромонтер мессенджергэ биир кыыстыын билсиспит, ол кыыс киниэхэ криптовалютаҕа харчы угарга этии киллэрбит. Эр киһи интэриэһиргээн, сөбүлэспит уонна салгыы трейдердэри кытта кэпсэппит.

Биржа сыһыарыытын хачайдаан ылан, кини 30 тыһыынча солкуобайы уган криптовалюта атыылаһа сатаабыт, ол эрээри баан харчыны ыытары тохтоппут. Иккис эрэ холонуутугар харчытын ыытарга кыахтаммыт.

Хас да нэдиэлэ ахсын эр киһи криптовалюта атыылаһан уонна ону биржаҕа ыытан, транзакциялары оҥортообут. Барыһын суумата тус счетугар көстөр курдук эбит. Салгыы кини араас бааннарга кирэдьиит ылан баран ону эмиэ «инвестициялаабыт». Уопсайа эмсэҕэлээбит киһи түөкүттэргэ 3,2 мөл. тахса солкуобайы ыыппыт.

Полиция сэрэтэр

Өскөтүн эһиэхэ түргэнник уонна улаханнык байар-тайар ньыманы сүбэлиир буоллахтарына, үксүгэр бу — албын буолар. Тус  дааннайгытын хаһан даҕаны туора дьоҥҥо биэримэҥ. Этиллибити итэҕэйбэт буоллаххытына, ол туһунан сиһилии чугас дьоҥҥутуттан сүбэтэ ыйытыҥ.