Итирик суоппар буруйунан эмсэҕэлээбит оҕоҕо 374 тыһ.солк. төлөннө

Бүлүү оройуонун суута киһи өлүүнэн түмүктэнэ сыспыт суол быһылааныгар сыһыаннаах дьыаланы көрдө.

Суут быһаарбытынан, 2025 сыл ыам ыйын 23 күнүгэр күүстээхтик итирбит туруктаах уонна массыына ыытар бырааба суох дьахтар бэлисипиэдинэн айаннаан иһэр оҕону түҥнэри көппүт. Дьолго, уол тыыннаах хаалбыт, ол эрээри доруобуйатыгар орто ыарахан бааһырыыны ылбыт. Ийэтэ уолун көрө-истэ таарыйа, үлэтиттэн уурайан, уһун кэмҥэ дьиэтигэр олорорго күһэллибит.

Дьыаланы көрүү кэмигэр биллибитинэн, массыына ханнык да официальнай докумуона суох, тылынан эрэ кэпсэтэн, билэр дьахтарыгар уруулу биэрбитэ быһаарыллыбыт.

Эппиэттээччилэр суут ирдэбилин билиммэтэхтэр. Дьахтар итирбит туруга суох этэ, оттон быһылааҥҥа кыра саастаах бэлисипиэдтээх уол бэйэтэ буруйдаах диэн дакаастыы сатаабыттар. Ол эрээри суут бу этиилэри ылымматах. Дьахтар буруйдааҕа сокуоннай күүһүгэр киирбит.

Дьыаланы көрүү түмүгүнэн, суут массыына хаһаайыныттан оҕо уонна кини ийэтин туһатыгар 300 тыһ. солк. моральнай хоромньуну толуйууга, ону тэҥэ ийэтэ оҕотун көрө-истэ олорон сүтэрбит хамнаһын оннугар 74 038 солкуобай 95 харчыны төлүүргэ уураахтаата. Ону таһынан, 7 тыһ. солк. судаарыстыбаннай нолуогу төлүөхтээх. Оттон массыынаны ыытан испит суоппарга түһэриллибит ирдэбил аккаастанна. Суут быһаарыыта сокуоннай күүһүгэр киирэ илик диэн Саха Өрөспүүбүлүкэтин сууттарын холбоһуктаах пресс-сулууспата суруйар.