Кэбээйи улууһугар ыксаллаах быһыы-майгы эрэсиимэ биллэрилиннэ

Ойуур уотун умулларыыга баһаарынай этэрээттэр 50-тан тахса бырыһыаннара үлэлииллэринэн сибээстээн, от ыйын 31 күнүттэн Кэбээйи улууһун сиригэр-уотугар муниципальнай таһымнаах ыксаллаах быһыы-майгы (ЧС) эрэсиимэ биллэрилиннэ.

Ыксаллаах быһыы-майгы эрэсиимэ үлэлиир кэмигэр баһаартан сэрэхтээх буолуу дьаһаллара күүһүрдүллэр. Ол курдук:

• Нэһилиэктэр баһылыктарыгар уоту умулларыыга эбии күүһү уонна сириэстибэлэри (тиэхиньикэни) тардалларыгар сүбэлэннэ;
• Быраабыланы кэһиилэри булар патрульнай уонна маневреннай бөлөхтөр үлэлэрэ күүһүрдүлүннэ;
• Нэһилиэнньэҕэ ойуур баһаарын балаһыанньатын туһунан иһитиннэриини тиэрдии тэрилиннэ;
• Ойуурга тахсыы кытаанахтык бобуллар.

Улуус олохтоохторун уонна ыалдьыттарын  тустаах дьаһал тахсыар диэри баһаартан сэрэхтээх буолуу быраабылаларын кытаанахтык тутуһалларыгар уонна тыаҕа сылдьартан туттуналларыгар көрдөһөллөр.