Кэбээйигэ түөлбэнэн хайыһар күрэхтэһиитэ буолла

Унньуктаах уһун кыһын ааһан, сандал саас сандаарыччы тыкпыт күнүнэн сыламнаан кэлбитин Кэбээйи нэһилиэгин олохтоохторо сынньалаҥ пааркатыгар уруйдаан көрүстүлэр.

Бу күн ырыаны, үҥкүүнү, атыыны-тутууну таһынан түөлбэнэн күрэхтэһии тэрилиннэ. Күрэхтэһии Саха сиригэр хайыһар успуорда 100 сылыгар, Аан дойдутааҕы «Лыжня России 2026» сүүрүүгэ, Кэбээйигэ ХХ үйэ аар-саарга аатырбыт хайыһардьыттарын өйдөөн-санаан ааһарга ананна. Күрэххэ түөлбэлэр оскуола үөрэнээччилэриттэн саҕалаан, 55 саастарын ааспыт кыттааччыга тиийэ кытыннылар.

Элбэх «ыалдьааччылаах», кыайыыга дьулуһуу күүрээннээх күрэх түмүгэр түөлбэлэр кыайыы кынаттанан, кыайыылаахтар түөстэрэ мэтээлинэн килбэйэн, ураты көрдөрүүлээхтэр анал бириискэ тиксэн санаалара көнньүөрдэ.

Саас сааһынан сырдатар буоллахха маннык. Түөлбэнэн күрэххэ Альбина Егорова салайааччылаах «Күөх кытыл» түөлбэ күрэсчиттэрэ бастаан таҕыстылар уонна XX үйэҕэ өрөспүүбүлүкэҕэ биллибит хайыһардьыт Е.Е.Эверстов ыччаттарыттан харчынан бириис туттулар. Иккис миэстэ минньигэс амтанын Наталья Обутова салайааччылаах «Ворошилов» түөлбэ биллэ. Бу түөлбэҕэ анал бирииһи анаатылар 1954-56 сс. өрөспүүбүлүкэҕэ хайыһар күрэхтэрин кыайыылааҕа И.В.Захаров ыччаттара. Онтон үһүс миэстэни Марианна Гуляева салайааччылаах «Тайылаахы» түөлбэ ситистэ. Бу түөлбэҕэ  Саха сирин хайыһардьыт устудьуоннарын хамаандатын чилиэнинэн сылдьыбыт М.И.Сметанина ыччаттарыттан анал бирииһи түөлбэ хамаандатын хамандыыра Аполлон Гуляевка туттардылар. Түөлбэҕэ Е.Е.Эверстов ыччаттара анал бириистэрин туттаран үөрүүнү үксэттилэр.

Бэтэрээн күрэсчит Е.А.Павлов анал бирииһин 50-тан үөһээ саастаахтарга бастаабыт Агафья Евелева уонна Сергей Семенов ыланнар махталларын тиэртилэр.

Биирдиилээн ситиһиилэри көрдөххө маннык буолла: Оскуола оҕолоругар кыргыттарга:

• 1 миэстэ — Обутова Карина («Ворошилов» түөлбэ);
• 2 миэстэ — Левина Алиана («Күөх кытыл»);
• 3 миэстэ — Софронеева Эвелина («Сайдам»).

Уолаттарга:

• 1 миэстэ — Сыроватский Алеша («Сарыал»);
• 2 миэстэ — Харлампьев Альберт («Тайылаахы»);
• 3 миэстэ — Иванов Олег («Ворошилов»).

Дьахталларга:

• 1 миэстэ — Пермякова Варвара («Хатыҥ Чараҥ»);
• 2 миэстэ — Дьяконова Пелагея («Тайылаахы»);
• 3 миэстэ — Федотова Мария («Күөх кытыл»).

Эр дьоҥҥо:

• 1 миэстэ — Левин Тимофей («Күөх кытыл»);
• 2 миэстэ — Гуляев Аполлон («Ворошилов»);
• 3 миэстэ — Кривошапкин Валерий («Сарыал»).

Бэтэрээннэр ыккардыларыгар:

• 1 миэстэ — Евелева Агафья Денисовна,
• 2 миэстэ — Андреева Ирина Васильевна

Эр дьоҥҥо:

• 1 миэстэ — Семенов Сергей Николаевич,
• 2 миэстэ — Кононов Иван Петрович,
• 3 миэстэ — Строев Александр Владимирович.

Чөл олоҕу күөрэччи тутар көхтөөх тэрээһини тэрийэн ыыттылар Т.С.Левин дириэктэр эбээһинэһин толорооччулаах  оҕо успуордун оскуолата. Тимофей Савельевич уонна тэрилтэ кэлэктиибэ хайыһар успуордун дьоро күнүн тэрийиигэ анал бириистэри туруорбут бастыҥ хайыһардьыттар ыччаттарыгар махталларын тиэртилэр. Хайыһар курдук үйэлэри уҥуордаан кэлбит успуорт бастыҥ күрэҕин күнэ өрө күүрүүлээхтик тэриллэн ыытылынна.

Татьяна Максимова-Лазарева