Көмөҕүт иһин махтанабыт!

Ытыктабыллаах Өлөөн улууһун баһылыга И.А.Саввинов, Ньурба оройуонун баһылыга А.М. Иннокентьев, Саха Өрөспүүбүлүкэтин  Гражданскай оборуонаҕа уонна олоххо-дьаһахха куттал суох буолуутун хааччыйыыга министиэристибэтэ, Ээйиктэн төрүттээх, куоракка олохтоох күндү биир дойдулаахтарбыт, Ньурба куоратыгар олорор кийииттэрбит, Ньурба оройуонун балыыһатын үлэһиттэрэ уонна Ээйик сэлиэнньэтин Далбар хотуннара!

Бу этиҥ уонна чаҕылҕан кэнниттэн Ээйик  сиригэр-уотугар турбут баһаар кэмигэр, эһиги күүскүт-көмөҕүт, өйөбүлгүт иһин ис сүрэхтэн барҕа махталбытын тиэрдэбит!

Өлөөн улууһун баһылыга Иван Александрович Саввинов  уматыгы уонна тиэхиньикэ арыытын түргэнник тиэрдиини хааччыйбыта, күүс-көмө буолбута. Алексей Михайлович Иннокентьев баһылыктаах Ньурба оройуонун дьоно-сэргэтэ ис сүрэхтэриттэн көмөлөспүт гуманитарнай көмөлөрүн тутан олус  диэн үөрдүбүт. Ньурба оройуонун эмчиттэрин көмөлөрө тугунан да кэмнэммэт.

Саха Өрөспүүбүлүкэтин Гражданскай оборуонаҕа уонна олоххо-дьаһахха куттал суох буолуутун хааччыйыыга министиэристибэтэ  сухой паёктары, бензопилалары,  мотопуомпалары,  фильтрдэри, харыстыыр ачыкылары, мааскалары ыыппыта. Бу тэриллэр түүннэри-күнүстэри баһаары утары туруулаһааччыларбытыгар олус наадалаахтар.

Ээйиктэн төрүттээх,  куоракка олорор кыргыттарбыт, Ньурбаҕа олорор кийииттэрбит хомуур тэрийэн, Саха сирин хас биирдии муннугуттан хомуллубут үбүнэн-харчытынан сүүрэн-көтөн, элбэх аһы-үөлү, туһалаах тэрили атыылаһан ыыттылар – бу барыта киһи сүрэҕин сылааһын көрдөрөр үтүө дьаһал.  Кинилэргэ уонна биһигини өйөөбүт дьоҥҥо барҕа махталбытын тиэрдэбит.

Дьокуускай куораттан, Ньурбаттан, Сунтаартан, Эдьигээнтэн уот умуруора кэлбит байыастарга уонна Ээйик хорсун-хоодуот уолаттарыгар сүгүрүйэбит!

Уонна, биллэн турар, Ээйик Далбар хотуттарыгар.  Кинилэр күннэри-түүннэри уоту утары охсуһар дьону сылаас аһылыгынан хааччыйдылар. Онон эһиги көмөҕүт уоту бохсууга   олус улахан тирэҕинэн буолла. Бу ыар түгэҥҥэ биир сомоҕо буолан, бэйэ-бэйэбитигэр көмөлөспүт уонна өйөспүт бар дьоммутугар, тэрилтэлэрбитигэр ис сүрэхтэн махтанабыт! Эһиги киһилии майгыгыт, үтүө санааҕыт хаһан да умнуллуо суоҕа. Барыгытыгар чэгиэн доруобуйаны, дьолу-соргуну, үлэҕитигэр-хамнаскытыгар үрдүк ситиһиилэри баҕарабыт!

Өлөөн улууһун Солоҕоон нэһилиэгин олохтоох дьаһалтата