Көмүс күһүнү кытта үбүлүөйбүтүн бэлиэтиэхпит

Капитоновкаҕа олохсуйан олорор В.И.Кононов аатынан кырдьаҕастар уонна инбэлииттэр олорор интэринээт-дьиэлэрэ тэриллибитэ 55  үбүлүөйдээх сылын манна олорооччулар эмиэ долгуйа күүтэллэр.

Ол туһунан биһиэхэ интэринээт-дьиэ олохтооҕо  Константин Николаевич Макаров махтал суругун таһаарарбытыгар көрдөстө.

—Биһиэхэ сотору көмүс күһүммүт күлбүтүнэн тиийэн кэлиэ. Ону кытта биһиги биһиги интэринээт дьиэбит 55 сыллаах үбүлүөйүн көрсүөхпүт.

Манна биһиэхэ куруук күүс-көмө, сүбэ-ама буолар үлэһит дьоммутун олус ытыктыыбыт. Үлэлээн ааспыт үлэһиттэрбит мичээрдэрин, истиҥ-иһирэх сүбэлэрин, кинилэр тапталларын ама умнар үһүбүөт?

Ол курдук, бастакы дириэктэрбит  Иннокентий Владимирович Коротких истиҥ сыһыанын хаһан да умнубаппыт. Кини  үлэтин чиэстээхтик, бэриниилээхтик толорон, билигин  Үлэ уонна социальнай сайдыы министиэристибэтигэр этэҥҥэ үлэлии сылдьарын истэн үөрэбит. Ону таһынан билиҥҥи кэм салайааччыта Алексей Петрович Шестаков истиҥ-эйэҕэс майгылаах, үтүө суобастаах. Ол да иһин, интэринээт-дьиэбит сылтан сыл аайы үчүгэй түмүктэрдээх.

Хас биирдии киһи олох олорорун тухары күннээҕи кыһалҕаны көрсөр, ордук саастаах дьон барарбыт-кэлэрбит ыараан иһэрэ кистэл  буолбатах. Ону туоһулаан тураммыт, кырдьаҕастарга,  инбэлииттэргэ бу курдук сырдык, сылаас дьиэни аспыттарыгар  барҕа махталбытын тириэрдиэхпитин баҕарабыт.

Бу буолаары турар кэрэ бэлиэ түгэҥҥэ ис сүрэхпититтэн сүгүрүйэн тураммыт истиҥ эҕэрдэбитин, махталбытын ыытабыт.