Киин куоракка «иноагент» дьахтар отчуот туттарбакка сууттанна

Дьокуускай куорат суута Саха сиригэр төрөөбүт 49 саастаах дьахтары, «тас дойду агенын» (иноагент) үлэтин бэрээдэгин кэспитин иһин (РФ АПК 19.34 ыст. 2 ч.), 40 000 солкуобай ыстарааптанна диэн СӨ Сууттарын холбоһуктаах пресс-сулууспата суруйар.

Суут быһаарбытынан, кини былырыын алтынньы уонна сэтинньи ыйдарга «иноагент» быһыытынан үлэтин туһунан отчуоттарын болдьоҕор туттарбатах.

Санатан эттэххэ, дьахтар былырыын  от ыйын 11 күнүгэр РФ Юстициятын министиэристибэтин дьаһалынан «иноагеннар» реестригэр киллэриллибитэ.

Административнай эппиэтинэскэ тардыллар киһи суут мунньаҕар кэлбэтэх, онон дьыала кинитэ суох көрүлүннэ. Сокуон быһыытынан, «иноагент» бэйэтин үлэтин туһунан боломуочуйалаах уорганнарга кэмигэр отчуоттуохтаах. Уураах сокуоннай күүһүгэр киирэ илик.