Киин куорат киинигэр уопсастыбаннай туалеттары туруоруохтара

Дьокуускайга Эргэ куоракка уонна Кыайыы болуоссатыгар уопсастыбаннай туалеттары туруорар былааннанар.

Билиҥҥи туругунан, уопсастыбаннай туалеттар Талое күөл таһыгар уонна Орджоникидзе болуоссатыгар тэриллэн үлэлии тураллар. Бу сирдэргэ куорат олохтоохторо да, кэлбит ыалдьыттар да элбэхтик сылдьаллар. Туһаныы төлөбүрэ — 50 солкуобай. Манна бары наадалаах усулуобуйалар көрүллүбүттэр, ол иһигэр мэлдьи ыраастааһын ыытыллар. Ааспыт сылга култуура уонна сынньалаҥ пааркатыгар эмиэ сылаас туалет аһыллыбыта.

«Статистика көрдөрөрүнэн, туалеттарынан туһанааччылар ахсааннара мэлдьи улаатара маннык инфраструктураҕа улахан наадыйыы баарын туоһулуурун бэлиэтиэххэ наада… Дьокуускай куорат Уокуруктааҕы дьаһалтата Саха сирин киин куоратын олохтоохторун уонна ыалдьыттарын олоҕун хаачыстыбатын тупсарар инниттэн «Эргэ куоракка» уонна Кыайыы болуоссатыгар уопсастыбаннай туалеттары эбии туруорар былааннаах», — диэн Дьокуускай ОДьКХ  департамена МАХ-ка иһитиннэрэр.