Кирэдьиитин төлөөрү, атын киһи малын ломбардка туттарбыт

Күннэтэ араас түбэлтэ тахса турар. Ол курдук, биир  киһи иэскэ киирэн баран,  атын киһи малын ломбарка туттарбыт.

Дьокуускай куоракка полиция 1-кы нүөмэрдээх отделын   дьуһуурунай чааһыгар  ноутбугун уордарбыт киһиттэн  сайабылыанньа киирбит.

Суһал-көрдүүр  үлэ кэмигэр холуобунай ирдэбил үлэһиттэрэ  уорбаланааччыны —  Ханалас улууһуттан төрүттээх 19 саастаах эдэр киһини булбуттар.

Быһаарыллыбытынан, эдэр киһи кирэдьиитигэр  иэстээх эбит. Онтун  төлөөрү  атын киһи баайын-дуолун ломбардка солуок биэрэргэ быһаарыммыт. Онон билэр киһитин кытта сибээстэһэн баран,  оонньуурга диэн ааттаан хас да хонукка ноутбугу уларсыбыт. Тиэхиньикэни  ылан баран, уорбаланааччы  ломбардка илдьэн туттарбыт уонна 32 тыһыынча солкуобайы ылбыт.

Бу түбэлтэнэн РФ Холуобунай кодексатын 159 ыст. 2 ч.  холуобунай дьыала көбүтүлүннэ.