Кирилл Бычков: «Ил Дархан отчуота олохпут бары хайысхаларын таарыйда»

Бэс ыйын 17 күнүгэр Ил Дархан Айсен Николаев Ил Түмэн дьокутааттарын иннигэр отчуоттаата. СӨ Бырабыыталыстыбатын бэрэссэдээтэлэ Кирилл Бычков бу туһунан санаатын үллэһиннэ:

— Ил Дархан отчуота олохпут бары хайысхаларын, экэниэмикэбит сайдар былааннарын таарыйда. Билиҥҥи экэниэмикэбит туруга дойдубутугар анал байыаннай дьайыы хаамыытыттан тутулуктаах. Саамай сүрүнэ — биһиги уопсай кыайыыбыт буолуохтаах, экэниэмикэ онно туһулаан үлэлиир.

Байыастар дьиэ кэргэттэригэр көмө салҕанара, кинилэр төрөөбүт-үөскээбит өрөспүүбүлүкэлэрэ өйүүрүн билэллэрэ улахан суолталаах. Саха сирин норуоттара анал байыаннай дьайыыга көхтөөх кыттыыларын, кыайыыны чугаһаталларын туһунан бэрэсидьиэн Владимир Путин бэлиэтээн турар.

Төһө да араас ыарахаттар баалларын үрдүнэн, экэниэмикэбит сайда турарын Ил Дархан бэлиэтээтэ. Кыһалҕалар бааллар — нолуогу хомуйууга, чуолаан бүддьүөтү оҥорор «АЛРОСА» дохуоттаах чааһыгар дьокутааттар элбэх ыйытыылары биэрдилэр.

Дьокутааттар ОДьКХ туһунан боппуруостары таарыйбакка ааспатылар. Ил Дархан бу салаа көдьүүстээх буолуохтааҕын тоһоҕолоон бэлиэтээтэ. Хас да сыл устата бу салааҕа туох да уларыйыы тахсыбатаҕа, билигин кэм хаамыытынан уонна уопсай балаһыанньанан, уларыйыылар тахсаллара уолдьаста. Чугастааҕы кэмҥэ биллэр түмүктэр баар буолуохтара диэн эрэнэбин.

Социальнай эйгэҕэ оҕолоох дьиэ кэргэттэргэ, кыаммат дьоҥҥо көмө оннунан хаалара эмиэ суолталаах. Биллэн турар, тыа хаһаайыстыбата эмиэ болҕомто күөнүгэр сылдьар. Улуустар баһылыктарыгар боломуочуйа бэриллэн, бу ньыма көдьүүстээҕэ көһүннэ.

Ил Дархан дьокутааттар бу кыһалҕалары сөпкө өйдүүллэрин уонна бииргэ үлэлииллэрин, бырабыыталыстыба үлэтин өйүүллэрин эттэ.