Константин Степанов айар үлэтин 15 сылынан аркыастыр доҕуһуоллаах кэнсиэри бэлэхтээтэ

Өксөкүлээх Өлөксөй  аатынан Норуоттар доҕордоһууларын дьиэтигэр «Таптал ырыалара» диэн Константин Степанов сольнай кэнсиэрэ,  «Якутия» эстрада аркыастыра (салайааччы Николай Пикутскай) доҕуһуоллаах буолан ааста.

Бу кэнсиэр Константин Степанов айар үлэтин 15 сыллааҕы үбүлүөйүгэр уонна Саха сиригэр Ийэ күнүгэр даҕааһыннаран ыытылынна. Бу күн  «Якутия» аркыастыр маҥнайгы улахан сүрэхтэниитин быһыытынан, көрөөччү иннигэр Константин Степанов толорор ырыаларын тыыннаах дорҕоонунан доҕуһуоллаабыттара олус кэрэхсэбиллээх буолла. Ону сэргэ Сахабыт  сиригэр  муусука ускуустубата үрдүкү таһымҥа тахсыыта муусуканы таптааччыларга дьоһуннаах бэлэх быһыытынан бэрт сонуннук иһилиннэ. Аркыастырга Николай Пикутскай дирижердаан, эдэр мусукааннар   хас биирдии дорҕоону кыһаллан,  сыыспакка толороллоро  үрдүк таһымы бигэргэтэр.

Хас ырыа ахсын тобус-толору саалаҕа олорор ийэлэр, кэрэ куолар дохсун ытыстарын тыаһынан доҕуһуоллаатылар. Бу буолар — ырыаһыт, ырыа айааччы дьоло. Көрөөччүлэр Константин Степанов ураты нарын тенор куолаһын олус сэргииллэрэ, кини ырыаларыгар сүгүрүйэллэрэ ырыаһыт бу дьоро киэһэтигэр илэ бааччы көһүннэ.

Константин Степанов удьуор мусукаан аҕа ууһун биир чаҕылхай уолларынан буолар. Захар Степанов диэн улахан композитор убайдаах, аҕата Роман Константинович Степанов-Толбон эмиэ мелодист, композитор. Төрөөбүт Мукучутун, Сахатын сирин, олох, таптал, ийэ туһунан  уостан түспэт элбэх ырыалары айан, биһирэниэн биһирэнэр.

Роман Константинович-Толбон уолун Константин дьоро киэһэтигэр байаанынан доҕуһуоллаан истиҥ иһирэх ырыаларын көрөөччүлэргэ бэлэхтээтэ.

Константин балта,  Д.К. Сивцев-Суорун Омоллоон аатынан Опера уонна балет судаарыстыбаннай тыйаатырын  опернай солистката Мария Шапошникова кэнсиэргэ дьоһуннаах ыалдьыт быһыытынан кыттыыны ылан киэргэттэ. Бернард Броуз тылыгар, Никола Паганины матыыбыгар «Lote penso amore» арианы толорбута көрөөччүлэр дохсун ытыстарын тыаһынан доҕуһуолланна.

Константин Степанов Галина Щахурдина, Алексей Егоров, Роман Степанов-Толбон уонна да атын ааптардар ырыаларын толордо. Көрөөччүлэр Марфа Куличкина «Сибэкки биэрээри» хоһоонугар Александр Дмитриев-Чүмэчи суруйбут ырыатын олус сөбүлүүллэрин биллэрэн,  уҕараабат дохсун ытыс тыаһынан көрүстүлэр.  Константин Степанов мээнэ ырыаһыт дураһыйбат  Полад Бюль-Бюль оглы ырыаларын кыайа-хото тутан, көрөөччүлэргэ бэлэхтээтэ. Урукку шлягердарга: «Долалай», «Шейк» диэн ырыаларыгар аҕам саастаах далбар хотуттар тэҥҥэ хамсанан эдэр эрдэҕинээҕилэрин санаан үҥкүүлэһэ олордулар. «Кыталык» образцовай үҥкүү ансаамбылын үҥкүүһүттэрэ  ырыаларга ис хоһооннорун ситэрэн, олус эрчимнээхтик, имигэстик үҥкүүлээн киэргэттилэр.

Ол тухары Николай Пикутскай салайар эстрада аркыастыра Константин Степанов бииртэн биир ырыаларын иэйиилээхтик, ардыгар эрчимнээхтик муусуканан доҕуһуоллаан, көрөөччүлэри киэҥ куйаарга көтүттэ.

Дьэ, кэнсиэр биир долгутуулаах түгэнэ тиийэн кэллэ. Көрөөччүлэр Константин Степанов «Ийэкээм» ырыатын маҥнайгы ноталара хомус тыаһын, аркыастыр,  скрипка, флейта доҕуһуолларынан  иһиллээттэрин кытта кэтэспит ырыаларын истээри  ытыстарын таһынан махтана көрүстүлэр. Бу ырыа айыллыбыт устуоруйатын үгүстэр билэллэр да буоллар, кылгастык сэгэтэн аһардахха маннык этэ.

2013 сыллаахха ийэм туһунан  «Хоһуун таас» диэн сэһэн суруйбутум. Ийэм 100 сааһыгар «Ийэкээм»  диэн хоһоон суруйбутум. Оччолорго Роман Степановы-Толбону  кытары биир оскуолаҕа үлэлии сылдьыбыппыт. Хоһооммун киниэхэ көрдөрбүтүм. Онуоха Роман Константинович хоһооммун ааҕаат,  «Бу айымньы ис хоһооно дойдунааттыы (патриотическай) эбит, онон үйэлээх ырыа буолуо», — диэбитэ уонна уһаппакка-кэҥэппэккэ матыып айбыта. Ону Костяҕа ыллатыахха диэн этии киллэрэн, аранжировкатын, запиһын  Бүөккэ Бөтүрүөпкэ оҥорторбутум.   2014 с. маҥнайгы «Үрдэл» мусукаалынай бириэмийэҕэ «Ийэкээм» ырыанан Костя лауреат буолбута. Аны онно килиип устуохха диэн санаа киирэн, Тим Третьяков диэн клипмейкэри булан,  сценарийын суруйан, ийэ оруолугар СӨ үтүөлээх артыыһын Елизавета Потапованы кэпсэтэн,  килииппитин устубуппут. Онон бу ахтыллыбыт бөлөх бары кыттыһан, «Ийэкээм» диэн Саха сирин ийэлэригэр гиимин кэриэтэ ырыаны оҥорон таһаарбыппыт. Костя бу ырыаны күн бүгүнүгэр диэри ыллыы сылдьарыгар махтанабын.

Ыччат да, аҕам да саастаах дьон ыллыылларын иһиттэхпинэ, сүрэҕим үөрүүнэн туолар. Саллааттар ийэлэрэ Мария Емельянова саллаат оҕолору көрсөрүгэр мэлдьи «Ийэкээм» ырыанан доҕуһуоллатан, алаадьы түҥэтэрин ситимҥэ долгуйа көрөөччүбүн. Төһөлөөх саллаат уолаттар дойдуларын, ийэлэрин санаан ахтылҕаннарын таһаараллара буолуой?  Сахабыт сирин ийэлэрэ барахсаттар,  бу ырыа эһиэхэ барыгытыгар ананар.

Дьэ, ити курдук Өксөкүлээх Өлөксөй  аатынан Норуоттар доҕордоһууларын дьиэтигэр 4 уонна 7 ч.  буолбут Константин Степанов айар үлэтин 15 сыллаах үбүлүөйдээх киэһэтигэр кэлбит көрөөччүлэр олус дуоһуйан тарҕастылар.

Василий ГОГОЛЕВ-УЙУЛҔАН, суруйааччы