Куокуйга «Театр эйгэтэ» бэстибээл буолла

Муус устар 8 күнүгэр Кэбээйи улууһун Куокуй нэһилиэгэр оскуола үөрэнээччилэрин икки ардыларыгар ыытыллар «Театр эйгэтэ»  улуустааҕы  бэстибээл иккис төгүлүн буолан ааста.

Бэстибээли улуустааҕы “Оҕо саас сирдьиттэрэ” федеральнай бырайыак Саха сиринээҕи киинэ «Оҕо саас навигатордара», улуустааҕы үөрэх салаатын салалтата, улуустааҕы оҕо дьоҕурун сайыннарар «Сайдыс» киин, Куокуй орто оскуолата, “Угуйаан” култуура киинэ тэрийэн ыыттылар.

Бэстибээлгэ улуус оскуолаларын иһинэн тэриллэн үлэлиир театрализованнай түмсүүлэр, драмкуруһуоктар, мини-театрдар, барыта 9 нэһилиэктэн 120 үөрэнээччи, 12 салайааччы кытынна. Суол-иис куһаҕанынан 8 нэһилиэк кэтэхтэн үлэлэрин ыыттылар. Хас сылын аайы оҕолор кыттыылара үрдээн, элбээн иһэллэрэ үөрдэр. Бу сырыыга дьүүллүүр сүбэ 12 туруорууну көрдө.

Быйыл Кэбээйи улууһугар өрөспүүбүлүкэтээҕи Олоҥхо ыһыаҕа ыытылларынан бары оскуолаларга, нэһилиэктэргэ олоҥхоҕо элбэх үлэ барбыта көстөр. Бу киэһэ «Аламай күн» бөлөх Прокопий Ядрихинскай-Бэдьээлэ «Дьырыбына Дьырылыатта кыыс бухатыыр» олоҥхоттон быһа тардыы ааҕан иһитиннэрдэ (сал. Полина Борисова). «Теремок»  кукольнай театр оҕолоро «Саһыл уонна Туруйа» нуучча үгэтигэр олоҕурбут туруорууну көрдөрдүлэр. Куокуй оскуолатын иһинэн үлэлиир «Чаҕылый»  театрализованнай түмсүү  оҕолоро сэһэнньит, остуоруйаһыт, бэтэрээн учууталбыт Степан Дмитриевич Сметанин суруйбут «Куокуй нэһилиэгин түстэниитэ» номоҕор олоҕуран, РФ уопсай үөрэхтээһин туйгуна, биир дойдулаахпыт Татьяна Давыдовна Максимова-Лазарева «Куокуй Хоһуун» испиктээкилин көрүүгэ таһаардылар.

Дьэ онон туруоруулары көрүү кэнниттэн дьүүллүүр сүбэ маннык түмүгү таһаарда:

Муҥутуур кыайыылааҕынан «Сайдыс» киин иһинэн үлэлиир Чагдатааҕы мини-театр (сал. Юлия Эверстова) буолла.

“Кукольнай театр” номинацияҕа 1миэстэни Куокуй орто оскуолатын «Теремок» кукольнай театра ылла (сал. Ася Яковлева, Владлена  Сергеева).

“Остуоруйа” анал аакка Сиэгэн Күөл оскуолата 1 миэстэҕэ (сал Алексеева В.Н.) таҕыста.

“Фольклор” анал аакка 1 миэстэни «Чаҕылый» мини-театр ылла (сал. С И. Васильева, С Н.Унарова).

Олоҥхо тиэмэтигэр Баҕадьа оскуолата (сал. Григорьева Е.Д) 1 миэстэни, 2  миэстэни Сиэгэн Күөл орто оскуолата (сал. Егорова И.А.), 3-с миэстэни Тыайа орто оскуолата (сал. Килижекова М П.) ыллылар.

“Кумахтан анимация” анал бириискэ Батамай оскуолата (сал. Чемезова А.К.) тигистэ.

«Бастыҥ актер» аатын Куокуй орто оскуолатын 11 кылааһын үөрэнээччитэ Дима Сметанин ылла.

Бастыҥ сценариһынан Кэбээйиттэн Татьяна Давыдовна Максимова-Лазарева ааттанна.

Бастыҥ режиссер аатын Полина Андреевна Борисова (Куокуй) “Добун суруктар” үлэтинэн  ылла.

Полина Жергина Кэбээйи улууһа Куокуй нэһилиэгэ.