Куорат мээрэ Евгений Григорьев Туймаада ыһыаҕар суруналыыстары кытта көрүстэ

Киин куорат мээрэ Евгений Григорьев быйылгы ыһыахха суруналыыстарга бүтэһик пресс-кэмпириэнсийэтин ыытта.

Айар үлэлээх дьон Евгений Григорьев мээрдээбит сылларын тухары үс сүрүн ситиһиитин ааттыырыгар көрдөстүлэр. Евгений Григорьев үс сылы быһа үлэлэһэн, элбэх кыбартыыралаах олорор дьиэлэр бары анал докумуоннаммыттарын бэлиэтээтэ. Кырдьык, бу улахан ситиһии.

Иккиһинэн, 2030 сылга диэри Дьокуускай куорат маастар-былаана оҥоһулунна. Үсүһүнэн, арыгылааһыны утары күүстээх үлэ ыытылынна. «Ити курдук, үс эрэ буолбакка, уонча ситиһиллибит пууну ааттыы туруохха сөп», — диэн эттэ мээр.

Салгыы суруналыыстар Евгений Григорьев баһылыгыттан уурайдаҕына ханна үлэлии барыаҕын, салгыы туох былааннааҕын, кини туһунан дьоҥҥо тарҕанар сурах-садьык төһө кырдьыктааҕын сурастылар. Биллэн турар, куорат баһылыга «бу маннык толкуйдаатым, былааным итинник, араас сурахха хоруйум бу курдук» диэн ыһа-тоҕо кэпсээбэтэ. Биир тылынан «Ийэ дойдум туох дииринэн быһаарыы ылыныам, бириэмэ көрдөрүөҕэ» диэн санаатын тиэртэ.

Суруналыыстар бэрт үгүс боппуруостарыттан «Тугу ситиспэккэ хааллыҥ?» диэн ыйытыыга мээр Евгений Григорьев «Көхтөөх уһун үйэлэнии киинин оҥорууну тиһэҕэр тиэрдибэккэ хааллым. Бу тирээн турар бүгүҥҥү күн ирдэбилэ» диэн хоруйдаата.

Араас ис хоһоонноох ыйытыылар истэригэр «Үс Хатыҥҥа айанныыр суол олус тупсубут эрээри, билигин да үс чаастаах уһун харыы (пробка) баар. Бу олох кыаллыбат боппуруос дуо?» диэн ыйытыыга мээр «түөрт балаһалаах суолу оҥордубут. Мантан атын толкуй суох. Мин кэннибиттэн кэлэр баһылык «пробканы» аҕыйатыыны тобулар ини» диэн эттэ.

Куорат мээригэр бастаан баһылыгынан талыллытыгар «ПАЗ» оптуобустары аҕыйатан, аныгылыы оӈоһуулаах оптуобус ахсаанын элбэтиэм» диэн эппитиҥ. Ол ону чиэстээхтик толордуҥ» диэн бэлиэтээһиҥҥэ Евгений Григорьев «бу мин соҕотох ситиһиим буолбатах — хамаанданан үлэ түмүгэ. Мин тустаах тэрилтэлэр бииргэ үлэлииллэригэр бэйэ-бэйэлэрин тиксиһиннэртээбитим», диэн бэлиэтээтэ.

«Сунтаар» позывнойдаах Дмитрий Егоров пааматынньыгын тутуутун боппуруоһа хайдах быһаарылынна?» диэн ыйыппыттарыгар, Евгений Николаевич «Пааматынньык бэлэм. Сотору туруоруохпут. Бу пааматынньыгы оҥорууга биир да солкуобай бүддьүөт харчыта ороскуоттаммата. Норуот көҕүлээһининэн, дьон бэйэлэрэ харчы хомуйан оҥортордулар.

«Сунтаар» кыргыһыы кэнниттэн доҕоро «Ронин» өлүгүн таһаараары хорсун быһыыны оҥоро сылдьан олоҕун толук уурбута. Уолаттар хайалара эмэ өллөҕүнэ, кинини хаалларбакка, сэрии хонуутуттан таһаарарга бэйэ-бэйэлэригэр тылларын биэрбиттэр. Ити эр киһи биэрбит тылын толоруута оҕону патриотизмҥа иитиигэ холобурунан буолар», — диэн эттэ Евгений Григорьев. Ити курдук, куорат мээрэ үгүс ыйытыыга толору хоруйдары биэрдэ.