Кытайга айан туһунан маастар-кылаас буолла

Алтынньы 16 күнүгэр »Саха сирэ» хаһыат эрэдээксийэтигэр Кытайга айан ымпыгын-чымпыгын туһунан маастар-кылаас буолла.

Маастар-кылааһы таһаарааччы эрэдээктэр Василий Прокопьев ыытта. Бу тэрээһиҥҥэ урут Кытайга сылдьыбыт эрээри, саҥа уларыйыылары, айан кистэлэҥнэрин билэ кэлбиттэр. Кэрэхсэбиллээҕэ диэн, кинилэр үүнэр сыл аҥаарыгар хаһыакка сурутууну бэлэх туттулар.
Чахчы, олох тэтимэ уларыйан, Кытайга уу харчынан туттубат, барыта сыһыарыыларынан туһанар буолбуттар. Аны таможняны туоруурга, каартаҕа харчыны угарга, тылбаасчыты туһанарга, бэл, такси сакаастыырга, о.д.а. ымпыга-чымпыга элбэх.
Кэлбит дьон элбэх ыйытыылары биэрэн, атах тэпсэн олорон кэпсэтэн, астыннылар. Кистэлэҥнэрин эрдэттэн биллэххэ, элбэх харчыны кэмчилиэххэ сөп.

Людмила, биэнсийэлээх:
— Мин уонча сыллааҕыта Кытайга сылдьыбытым да, онно атын этэ. Оҕолорбун батыһа эрэ сырыттаҕым дии, онон үчүгэйдик өйдөөбөппүн. Чахчы, олох уларыйбыт, сайдыы барбыт эбит. Мин бу Василий үһүс-маастар кылааһыгар сырыттым. Тиэмэлэринэн арааран, бэркэ ыытар. Үчүгэйэ диэн, »Саха сирэ» хаһыакка сурутабыт. Билиим-көрүүм кэҥээтэ, туһаныам диэн эрэнэбин. Баҕарар сирим буолунай, ханна эмит барыахпын баҕарабын да, бакаа айанныы иликпин, — диэн санаатын үллэһиннэ.