Маҕаһыыҥҥа табаар сыанатын уларытан сыһыарбыт эр киһи тутулунна

39 саастаах эр киһи үрдүк сыаналаах электрокабельга чэпчэки табаар сыаната суруллубут кумааҕытын уларытан сыһыаран баран каассаҕа төлүү сатаабыт. Бу албыннааһыны харабыллар камера нөҥүө бэлиэтии көрбүттэр.

Росгвардия үлэһиттэрэ сокуону кэһээччини тутан, полицияҕа туттарбыттар. Маҕаһыыҥҥа оҥоһуллубут хоромньу кээмэйэ 11,5 тыһыынча солкуобайтан тахса буолбут, оттон табаар төттөрү былдьаммыт. Билигин ити түбэлтэнэн холуобунай дьыала тэрилиннэ диэн ИДьМ пресс-сулууспата суруйар.