Майа сэлиэнньэтэ Бүтүн Арассыыйатааҕы куонкурус лауреатынан буолла

Майа сэлиэнньэтин муниципалитета «Майа Сайына» — Лето Майи: как жители села своими руками изменили территорию и себя» бырайыак «Повышение узнаваемости муниципального образования (бренд территории)» номинациятыгар кытынна.

«Биһиги бырайыакпыт гражданнар көхтөрүн күүһүрдэргэ, сэлиэнньэни аныгы эйгэлээх оҥорорго хайысхаланар. Тыа сирин сайыннарыы сэлиэнньэтин сүрүн суолтатынан чөл олоҕу, көхтөөх уһун үйэлэниини, норуот үгэстэригэр харыстабыллаах сыһыаны уонна хас биирдии олохтоох табыгастаах эйгэҕэ кыттарын ааттыыбыт. Инвестиция уопсай кээмэйэ 180 мөлүйүөн солкуобайтан таҕыста. Хапытаалга бүддьүөтү таһынан инвестиция кээмэйэ бырайыак олоххо киллэриллибит 5 сылын иһигэр 228 % улаатта. Бу бренд биһиги муниципалитеппытыгар туристар кэлиилэрин 137 % улаатыннарга көмөлөстө. Куонкуруска кыттыы уонна кыайыы  соруктары ордук көдьүүстээхтик быһаарарга, Майа сэлиэнньэтигэр ордук табыгастаах усулуобуйаны тэрийэр туһугар уопуту мунньарга көмөлөһөр”, —— диэн быраактыка ааптара, Майа сэлиэнньэтин баһылыга Алексей Неустроев иһитиннэрдэ.

Сыл аайы ыытыллар “Бастыҥ муниципальнай быраактыка” Бүтүн Арассыыйатааҕы куонкурус 2017 сылтан ыытыллар. Куонкуруска кыайбыт бырайыактар федеральнай таһымҥа билиниини ылаллар. Наҕараадалааһын үөрүүлээх сиэрэ-туома ахсынньы 10 күнүгэр Екатеринбург куоракка ыытыллыаҕа.

Санатан эттэххэ, тыа сирин нэһилиэктэрин ортолоругар 2025 сыллаахха лауреатынан Мэҥэ Хаҥалас улууһун Төҥүлү сэлиэнньэтэ буолбута. Ол курдук, Мэҥэ Хаҥалас улууһун муниципалитеттара иккис сылын “Бастыҥ муниципальнай быраактыка” Бүтүн Арассыыйатааҕы куонкурус  кыайыылааҕынан буоллулар.

СӨ Ил Дарханын уонна бырабыыталыстыбатын пресс-сулууспата