Владимир Путин Саха сирин архитектордарын этиилэрин Арассыыйа үрдүнэн үлэҕэ киллэрэр дьаһал таһаарда

Арассыыйа Бэрэсидьиэнэ Владимир Путин куораттары сайыннарыыга уонна тупсарыыга аналлаах мунньах түмүгүнэн дьаһаллары бигэргэттэ. Бу дьаһаллар испииһэктэригэр Саха сирин архитектордара Мария Скрябина уонна Анку Гасич этиилэрэ киирдилэр.

Кинилэр этиилэрэ «Олох-дьаһах инфраструктурата»национальнай бырайыак чэрчитинэн олоххо киириэхтэрэ.

Мунньахха этиллибит биир сүрүн хайысханан — «База 14» бюро архитектора Мария Скрябина этиитэ буолла. Кини куорат эйгэтин АБДь кыттыылаахтарын өйүүр уустук  үлэ чааһын быһыытынан көрөргө этии киллэрбит. «Киһи куорат уулуссаларынан мэһэйэ суох сылдьыахтаах, уопсастыбаннай сирдэргэ сылдьар, адаптивнай успуордунан дьарыктанар кыахтаах буолуохтаах. Ол реабилитация ааһа сылдьар дьоҥҥо ордук наадалаах. Архитектура киһини олоххо төннөрөр күүстээх буолуохтаах», — диэн бэлиэтээтэ Скрябина.

Оттон НОМАДО архитектурнай бюро салайааччыта Анку Гасич Компетенция кииннэрин үлэлэригэр биир кэлим федеральнай стандарты киллэрэргэ уонна куораты тутууга архитектор оруолун үрдэтэргэ этии киллэрдэ. Бу маастар-былааннары олоххо киллэрэргэ улахан көмөнөн буолуоҕа.

«Биһиги исписэлиистэрбит федеральнай таһымҥа тахсан, Саха сиригэр эрэ буолбакка, Бүтүн Арассыыйа куораттара сайдалларыгар аналлаах тиһиктээх этиилэри киллэрбиттэрэ — биһиги архитектурнай оскуолабыт үрдүк таһымҥа тахсыбытын туоһулуур», — диэн Ил Дархан Айсен Николаев бэлиэтээтэ.

Санаттахха, быйыл өрөспүүбүлүкэбитигэр 46 тупсарыы бырайыага олоххо киирэр, онтон 13-һэ Бүтүн Арассыыйатааҕы куонкурус кыайыылааҕа буолбуттара. Барыта холбоон 2018 сылтан Саха сирэ маннык куонкурустарга 39 төгүл кыайан, 2,5 миллиард солкуобай федеральнай үбү-харчыны тардыбыт!

Ахсынньы ыйга Дьокуускайга Уһук Илин эрэгийиэннэрин бастыҥ уопуттарын түмэр «Дальарх» архитектурнай бириэмийэни туттарыы бастакы тэрээһинэ буолуоҕа.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.

Сиһилии: https://www.sakha.gov.ru/news/68217