Ретрограднай Меркурий сэтинньи 13 күнүгэр диэри салҕанар

Алтынньы 24 күнүн киэһэтиттэн саҕалаан сэтинньи 13 күнүгэр диэри куйаарга Ретрограднай Меркурий кэмэ. Астрологтар сэрэтэллэр: Меркурий Скорпион бэлиэтигэр киирэр уонна дьайыыта күүһүрэр. 

Астрологияҕа Меркурий — сибээс, айан, докумуон уонна атыы-эргиэн планетата. Ол иһин кини «төттөрү» эргийэр кэмигэр бу эйгэлэргэ барытыгар харгыстар, сыыһалар-халтылар тахсаллар. Сэтинньи 30 күнүгэр диэри планета «күлүк» кэмигэр сылдьыаҕа, ол эрээри саамай сэрэхтээх кэмэ — сэтинньи 13 күнүгэр диэри.

Бу нэдиэлэҕэ маннык эйгэлэргэ ураты болҕомтолоох буолуҥ:

• Үлэ уонна докумуон. Ханнык баҕарар дуогабарга (холобур, массыына атыылаһыыта, дьиэ куортама эбэтэр кирэдьиит) илии баттыаххыт иннинэ сэттэ төгүл ааҕыҥ. Сыыппараларга, болдьохторго уонна кыра буукубанан суруллубут усулуобуйаларга алҕастар тахсыахтарын сөп. Дьон тылынан эппит эрэннэриитигэр итэҕэйимэҥ.
• Дьону кытта сыһыан уонна таптал. Ретрограднай Венера дьайыытынан, дьон сыһыана олус күүрүөҕэ. Урукку өйдөспөт буолуулар эмискэ күөрэйиэхтэрэ. Дьиэ кэргэн иһигэр иирсээн тахсара олус кутталлаах — тулуурдаах буолуҥ.
• Саҥа саҕалааһыннар. Саҥа бырайыактары, улахан дьыалалары (биисинэс арыйыыта, саҥа дьиэҕэ көһүү) саҕалыыртан туттунуҥ. Кэлин барытын хат оҥорорго күһэллиэххит.
• Айан уонна тиэхиньикэ. Айанныыр дьон сэрэниҥ. Массыынаҕыт туругун, оһоҕун, көлүөһэтин бэрэбиэркэлэниҥ. Билиэттэргитин, айанныыр бириэмэҕитин бутуйуоххутун сөп.

Сэтинньи 13 күнүгэр диэри тугу гынар сүбэлэнэрий:

1. Урукку дьыалалары түмүктээһин. Уһуннук тардыллыбыт, умнууга хаалбыт үлэлэргитин (холобур, дьиэ өрөмүөнэ, идэһэ өлөрүүтэ, гараас сылытыыта) бүтэрэргэ саамай табыгастаах кэм.
2. Докумуоннары бэрэбиэркэлээһин. Урукку дуогабардаргытын хат ааҕыҥ, ситэриллибэтэх докумуоннаргытын (холобур, сир эбэтэр дьиэ докумуона) сааһылааҥ.
3. Үп-харчы бэрээдэгэ. Нолуоккутун, ОДьКХ  иэстэргитин төлөөҥ. Бэйэҕит бүддьүөккүтүн хат көрүнүҥ.
4. Урукку былааннарга төннүү. Урут сатамматах санааларгытын хат толкуйдаан, алҕастаргытын көннөрүөххүтүн сөп.

Сэтинньи 13 күнүгэр диэри тугу гынар бобуулааҕый:

1. Тиэтэйэн түргэн быһаарыныы ылыныы. Докумуоннары аахпакка эрэ илии баттаамаҥ . Саарбах этиилэргэ киирэн биэримэҥ.
2. Улахан эппиэтинэскэ (иэскэ) киирии. Кэлин уларытарга уустук буолар быһаарыныылары (улахан иэс, ипотека ылыытын) кыаллар буоллаҕына сэтинньи ортотугар диэри көһөрүҥ.
3. Тылгытыттан тахсыы. Мөккүөрдээх түгэннэргэ тиэтэйэн ким эрэ буруйдааҕын көрдүү сатаамаҥ. Урукку тапталгытын, урукку кэргэҥҥитин кытта сибээскэ тахсартан туттунуҥ — бу Венера уонна Меркурий албына буолуон сөп.