Массыына күрэтиигэ буруйданар оҕолор дьыалаларын көрүү түмүктэннэ

Саха сирин Силиэстийэлиир управлениетын Дьокуускай куорат силиэстийэлиир отделынан РФ ХК 166-с ыстатыйатын 2-с чааһын «а» пуунунан (бөлөҕүнэн эрдэттэн кэпсэтэн тырааныспары күрэтэн айаннааһын) көрүллүбүт буруйу оҥорууга буруйданар 15 уонна 17 саастаах икки сокуоннай саастарын ситэ илик оҕолорго сыһыаннаан холуобунай дьыала силиэстийэтэ түмүктэннэ. Бу туһунан биэдэмистибэ пресс-сулууспата суруйар.

Силиэстийэ быһаарбытынан, бу сыл ыам ыйын 5 күнүгэр киэһэ буруйданааччылар анал стоянкаҕа турар тырааныспардары көрөн, куоратынан хатааһылыан баҕаран, түүнүн стоянка сиригэр киирэн уоран айанныырга кэпсэппиттэр. Онон уолаттар уоруйахтыыр сыала суох, сокуону кэһэн тырааныспар сириэстибэлэрин ылан айанныыр сыаллаах эрдэттэн кэпсэппиттэр.

Буруйдаах санааларын толорор сыалтан буруйданааччылар түүнүн анал стоянкаҕа кэлэн, күрүө тимир сиэккэтин алдьатан киирбиттэр. Онно буруйданааччылар холбоһон,  күлүүстэрэ хаалларыллыбыт «REGULMOTO SPITFIRE PRO» питбайгы уонна «REGULMOTO SPORT 003» матасыыкылы булан, уоран айаннаабыттар.

Кэлин сокуоннай сааһын ситэ илик оҕолортон биирдэстэрин ГРЭС оройуонугар айаннаан истэҕинэ ГИБДД автопатруля көрбүт уонна эккирэтииттэн куотан, матассыыкылын хаалларан куоппут. Иккис тырааныспары полиция үлэһиттэрэ хаһаайына сайабылыанньа суруйбутун кэннэ булбуттар, оттон уоран айаннааччылар кимнээхтэрин олус кылгас кэм иһигэр быһаарбыттар.

Силиэстийэнэн дакаастыыр баазаны хомуйууга уонна бигэргэтиигэ туһуламмыт бары наадалаах силиэстийэлиир дьайыылар ыытыллыбыттар. Дьокуускай куорат борокуруорун эбээһинэһин толорооччу бигэргэппит буруйдуур түмүгүн кытта холуобунай дьыала ис хоһоонунан көрүллэригэр суукка ыытылынна.