Массыынаны атыылаһааччылары сэрэтэллэр

Түөкүттэр массыынаны атыыласпыт дьоҥҥо эрийэн, «утилизация төлөбүрүн төннөрөргө көмөлөһөбүт» диэн албынныыр буолбуттар.

Утилизация төлөбүрэ диэн бүддьүөккэ киирэр хайаан да ирдэниллэр төлөбүр, массыынаны аан бастаан учуокка туруоралларыгар ылаллар. Ону бары төлүүллэр: дойдуга оҥоһуллубут саҥа массыына да буоллун, тас дойдуттан аҕалыллыбыт омук массыыната да буоллун. Арай АвтоВАЗ, КамАЗ курдук дойду собуоттара бу төлөбүрү бүддьүөттэн төнүннэрэллэр.

Түөкүттэр бу төлөбүрү, Евросоюз нөҥүө “лазейка” баар, ону туһанан төнүннэрэбит, диэн 10-15 тыһ. солк. көрдүүллэр. Дьиҥэр, ханнык да  үүт-хайаҕас суох. Кыргызстан уонна Казахстан нөҥүө оҥоһуллар исхиэмэ сабыллыбыта, онон утильтөлөбүр таможня уонна налоговай нөҥүө эрэ оҥоһуллар буолан турар.

Сокуон быһыытынан, харчыны төннөрүү биир эрэ түбэлтэҕэ кыаллар: массыынаны Арассыыйаҕа хаһан да төттөрү киллэрбэттии таһаарар буоллаххына, диэн “Российскай газета” быһаарар.