Меценат, атыыһыт Семен Барашковка аналлаах быыстапка

 Семен Петрович Барашков саха саарыннара дэнэр дьонтон биирдэстэрэ буолар. Кини олоҕун, үлэтин-хамнаһын чахчы да норуот холобур туттар, уос номоҕо оҥостон илдьэ сылдьар.

Бүгүн 1№-дээх Бырабыыталыстыба дьиэтигэр атыыһыт-сырдатааччы, меценат Семен Петрович Барашков төрөөбүтэ 150 сылыгар “Мин хаһаайыстыбам тулалыыр дьоммор холобур буолара” диэн ааттаах быыстапка аһыллан үлэтин саҕалаата. Быыстапканы Хаҥалас улууһун дьаһалтата, Эргиэн-бырамыысыланнай балаатата уонна Култуурунай нэһилиэстибэни харыстыыр управление тэрийэн ыыттылар.

Афанасий Ноев, СӨ култуураҕа миниистирэ:

“Семен Барашков хотугу сири хайдах баһылаан, дьаһанан олоруохха сөбүн көрдөрбүт киһи буолар. Сир оҥоруутун, меценатствоны, киһи олорор эйгэтин оҥостууну саха норуотугар бастакынан саҕалаабыта. Улуу Өксөкүлээх Өлөксөйү кытта улахан доҕордуу дьон этиилэр, икки улуу дьон өйдөрө-санаалара, норуокка туһалыыр кыахтара хайдах айыахха, оҥоруохха сөбүн көрдөрөллөр. Кулаковскай “Саха интеллигенциятыгар” суругун Семен Барашковка олорон суруйбута мээжнэҕэ буолбатах. Саха сирин сайыннарар идиэйэлэрин саха норуотугар суругунан тиэрдибиттэрэ. Кинилэр өйдөрө-санаалара ХХ үйэҕэ  биһиги РФ биир бастыҥ инникилээн иһэр субъегын быһыытынан толкуйдуурбутугар, сайдарбытыгар кыаҕы биэрбитэ. Ол курдук ХХ үйэ саҕаланыыта этиллибит идиэйэлэри Бастакы Бэрэсидьиэммит Михаил Николаев салҕаан илдьэ барбыта”.

СӨ Эргиэн-бырамыысыланнай балаата бэрэсидьиэнэ Марина Богословская, ааттаах-суоллаах атыыһыттары, меценаттары сыллата үйэтитэр, чиэстиир буолбуттарын эттэ. Ол быһыытынан быйылгы урбаанньыттар пуорумнара Семен Барашковка ананарын иһитиннэрдэ.

Семен Барашков чахчы да бэйэтин кэмин уһулуччулаах толкуйдаах киһитэ буоларын элбэх холобур кэрэһилиир. Ол курдук Саха сиригэр бастакынан  бэйэтин хаһаайыстыбатыгар электрическэй уоту киллэрбит. Ити кэнниттэн икки сыл буолан биирдэ Дьокуускайга уот киирбит.

“Бу улахан баҕа санаалаах киһи буолар, — диэн бэйэтин санаатын үллэһиннэ  Хаҥалас улууһун баһылыга Сергей Гребнев. – Уонна ол баҕа санаатын олоххо киллэрэр дьиҥнээх рационализатор этэ. Үөрэҕи, духуобунаһы үрдүктүк сыаналыыра, таҥара дьиэтэ, оскуола тутуллуутугар элбэхтик үбүнэн көмөлөспүтэ”.

Сергей Гребнев, улуус сайдыытыгар кылааттарын киллэрбит урбаанньыттарга Семен Барашков аатынан бэлиэ туттаралларын туһунан кэпсээтэ. 1 мөл. солк. укпуттарга кыһыл көмүс бэлиэни, 500 тыһ. солк  укпуттарга үрүҥ көмүс, 200 тыһ. солк. укпуттарга боруонса бэлиэни туттараллар эбит. Улуус баһылыга урбаанньыттыыр кэмигэр 2 истиэпэннээх үрүҥ көмүс бэлиэни кэппитин киэн тутта эттэ.

Быыстапкаҕа дьон болҕомтотун Семен Барашков сиэн балта Наталья Владимировна Барашкова ылла.

“Семен Петрович үөрэҕи олус сыаналыыра, нэһилиэгэр да, куоракка да атын атыыһыттардыын кыттыһан Дьокуускайга оскуолалары, дьахталлар пансионаттарын туттарбыттара. Киэҥ хайысхалаах хаһаайыстыбалааҕа, 700 буут арыыны Бодойбоҕо ыытара. Куоракка икки маҕаһыыннааҕа. Быыстапкаҕа кинилэр дьиэ кэргэттэрин хаартыскалара, маллара турар. Ону барытын түмэлгэ, оскуолаҕа туттарбытым. Бу ыҥыыр холобура мин хос-хос эһээм Зосим Алексеевич Барашков киэнэ.

Аҕатын 2021 с. суох гыммыттарын кэннэ кыыһа Анна Семеновна Алдаҥҥа олорбута. Биһиги үөрэххэ киирдэхпитинэ олус үөрэрэр. Билии диэн күүс диирэ”, — диэн сэһэргээтэ.

Саха биир чулуу киһитэ Семен Барашков аата өр сылларга умнулла сылдьан баран, 1991 с. норуотугар төннүбүтэ.