Мэдиссиинэ өҥөтүнэн Саха сирэ Арассыыйаҕа биэс бастыҥ эрэгийиэн иһигэр киирдэ

Саха сирэ балаҕан ыйынааҕы көрдөрүүгэ олоҕуран, нэһилиэнньэ мэдиссиинэ көмөтүнэн уонна хаачыстыбатынан туһаныытыгар үрдүк таһымын көрдөрдө — 71,9%. Бу чахчылары  Доруобуйа харыстабылын министиэристибэтэ Биир кэлим биэдэмистибэлэр икки ардыларынааҕы статистика тиһигэр (ЕМИСС) бэчээттээтэ.

Арассыыйа үрдүнэн ортотунан ылар буоллахха, нэһилиэнньэ 58,3% мэдиссиинэ өҥөтүттэн астынар. Саамай үрдүк көрдөрүү Чеченскэй Өрөспүүбүлүкэҕэ бэлиэтэннэ – 89,3%. Биэс бастыҥ  иһигэр (ТОП-5) Саха сирин кытта  Алтай Өрөспүүбүлүкэтэ (73,4%), Челябинскай уобалас (72,3%) уонна Москва куорат (71,9%) киирдилэр.

Саха сирин Ил Дархана Айсен Николаев бу иннинэ бэлиэтээн эппитин курдук, өрөспүүбүлүкэҕэ кэнники сылларга инфарктан өлүү 36%, оттон инсультан өлүү 24% аччаата. Итини таһынан, искэҥ ыарыыларын саҥа саҕаланан эрэр кэмигэр эмтиир кыахтаннылар.

Маннык үрдүк көрдөрүүлэргэ тиийэргэ мэдиссиинэ тэрилтэлэрин матырыйаалынай-тиэхиньиичэскэй баазаларын саҥардыыта улахан оруолу оонньоото. Кэнники сылларга Онкологическай, Кардиологическай  уонна Перинатальнай кииннэр тутуллубуттарын таһынан, улуустааҕы балыыһалары, поликлиникалары, суһал көмө станцияларын саҥардыы салҕанар. Ону тэҥэ тыа сиригэр ФАП-тар уонна быраас амбулаториялара тутуллаллар.

Саха сиригэр телемэдиссиинэ эмиэ күүскэ сайдар.

«Биһиги мэдиссиинэ көмөтө дьоҥҥо чугас уонна тиийимтиэ буоларын хааччыйабыт, инфраструктураны тупсарабыт, эмтээһиҥҥэ уонна диагностикаҕа саҥа, бастыҥ технологиялары олоххо киллэрэбит уонна үрдүк квалификациялаах каадырдары бэлэмниибит. Ити дьон мэдиссиинэ өҥөтүнэн туһаныытын үрдүүрүгэр быһаччы көстөр», — диэн  доруобуйа харыстабылын миниистирэ Лена Афанасьева бэлиэтээтэ.

Санаттахха, нэһилиэнньэ мэдиссиинэ өҥөтүттэн астыныытын ааҕар методиканы Доруобуйа харыстабылын министиэриистибэтэ 2022 сыллаахха бигэргэппитэ. Бу көрдөрүү «Уһун уонна көхтөөх олох» (национальнай бырайыак «Доруобуйа харыстабылын маҥнайгы сүһүөҕүн саҥардыыта» федеральнай бырайыагын чэрчитинэн кэтээн көрүллэр.