Мэҥэ Хаҥалас улууһугар бэтэрээннэр Саха сиринээҕи АБДь бэтэрээннэрин ассоциациятыгар киирдилэр

Мэҥэ Хаҥалас улууһугар Анал байыаннай дьайыы бэтэрээннэригэр суолталаах тэрээһин буолан ааста диэн «Аҕа дойдуну көмүскээччилэр»судаарыстыбаннай пуонда Саха сиринээҕи филиалыгар иһитиннэрдилэр.

Тэрээһиҥҥэ социальнай координатор Елена Аммосова көмөтүнэн Анал байыаннай дьайыы бэтэрээннэрэ ыҥырылыннылар. Көрсүһүү төгүрүк остуол быһыытынан ааста, манна сүрүн түмүгүнэн бэтэрээннэр Саха сиринээҕи АБДь бэтэрээннэрин ассоциациятын састаабыгар үөрүүлээхтик киириилэрэ буолла.

Мустубут дьоҥҥо эҕэрдэ тылын улуус баһылыгын ыксаллаах быһыыга-майгыга уонна олох-дьаһах хааччыйыытыгар солбуйааччыта Николай Никифоров эттэ. Кини бэтэрээннэргэ Саха сирин Ил Дарханыттан өйдөбүнньүк бэлэхтэри — саха быһахтарын туттарда. Бу быһахтар буойуннар Аҕа дойду иннигэр килбиэннээх сырыыларын уонна хорсун быһыыларын билинии бэлиэтинэн буоллулар. Маны таһынан, хас биирдии кыттааччыга Анал байыаннай дьайыы бэтэрээннэрин ассоциациятын кэккэтигэр официальнайдык киирбиттэрин туоһулуур дастабырыанньалар туттарылыннылар.

Официальнай чаас түмүктэммитин кэннэ, көрсүһүү илэ сэһэргэһии быһыытынан салҕанна. Кыттааччылар бэйэлэрин интэриэһиргэтэр, саамай сытыытык турар ыйытыыларыгар: сир учаастагын тыырыыга, үлэҕэ киириигэ, социальнай хантараагы оҥортууга уонна да атын өйөбүл миэрэлэригэр исписэлиистэртэн толору, итэҕэтиилээх хоруйдары ыллылар.

Санатан эттэххэ, быйылгы сыл саҕаланыаҕыттан «Аҕа дойдуну көмүскээччилэр» пуонда филиалын көмөтүнэн байыаннай дьайыы бэтэрээннэрин уонна АБДь өлбүт буойуннар дьиэ кэргэттэрин кытта 240-тан тахса тэрээһин ыытылынна. Бу тэрээһиннэргэ барыта 14 тыһыынчаттан тахса киһи хабылынна.