Миграция эриэйдэлэрэ: 2500 эбийиэги бэрэбиэркэлээтилэр

Саха сиринээҕи ИДьМ миграция боппуруостарыгар управлениета тэрийбит «Уклонист» суһал-сэрэтэр эпэрээссийэтин түмүгэ таҕыста.

Эпэрээссийэҕэ күннэтэ 160-ча ОВД үлэһитэ кыттыбыта. Кинилэр 707 омук гражданнарын уонна  кэтэх дьиэлэри, миграннар түөлбэлээн олорор сирдэрин, тутуу, атыы-эргиэн, үөрэх кыһаларын, олох-дьаһах, хомунаалынай хаһаайыстыба, промышленнай, эргиэн-ыскылаат, аһы-үөлү атыылыыр тэрилтэлэри, тырааныспар уонна да атын 2500 эбийиэги бэрэбиэркэлээтилэр.

Эпэрээссийэ кэмигэр полиция үлэһиттэрэ Дьокуускайга, Алдан, Амма, Бүлүү, Горнай, Ленскэй, Мэҥэ Хаҥалас, Мииринэй, Нерюнгри, Өлүөхүмэ, Хаҥалас улуустарыгар миграция эйгэтигэр 134 административнай быраабы кэһии тахсыбытын буллулар. 640 000 солк. кээмэйдээх административнай ыстараап түспүтүттэн, аҥаара хомуйулунна.

Итини тэҥэ Дьокуускай, Нерюнгри, Мииринэй полициятын отделлара «Фиктивная постановка на учет иностранного гражданина или лица без гражданства по месту пребывания в Российской Федерации» РФ Холуобунай кодексын 322.3 ыстатыйатынан буруйу оҥоруу булуллубутун туһунан полиция үлэһиттэриттэн 11 сайабылыанньа киирбитин регистрациялаатылар.

Эриэйдэлии сылдьан полиция үлэһиттэрэ көрдөбүлгэ сылдьар 36 саастаах Арассыыйа гражданинын булан ылбыттар.

Миграционнай полиция 12 омук гражданиныгар Арассыыйаҕа киирэллэрин бобор 24 быһаарыыны таһаарда. Сокуону кэһэн олорор 22 омук гражданинын булан, дойдуттан таһаарар быһаарыы ылылынна, диэн Саха сиринээҕи ИДьМ иһитиннэрэр.