Мииринэй олохтооҕо сөмөлүөттэн жилеты уоран сууттанар буолла

Новосибирскай — Мииринэй хайысхатынан көппүт сөмөлүөттэн быыһыыр жилеты уорбуттар. Буруйдаах киһи тутулунна уонна суукка эппиэттиэхтээх.

Бу туһунан авиахампаанньа диспетчерэ полицияҕа тыллаабыт. РФ ИДьМ Уһук Илиннээҕи федеральнай уокурукка Тырааныспарга салаатын пресс-сулууспата иһитиннэрэринэн, полиция үлэһиттэрэ аэропорт дьиэтиттэн тахсан эрэр 44 саастаах Мииринэй олохтооҕун туппуттар.

Силиэстийэ кэмигэр эр киһи быыһыыр жилеты бэйэтин наадатыгар туһанаары уорбутун билиммит. Уоруллубут тэрил авиахампаанньаҕа төннөрүлүннэ. Билигин киниэхэ уорууга сорунуу чахчытынан холуобунай дьыала тэриллэн, дьыала суукка көрүллэргэ ыытылынна.

Тырааныспарга полиция санатар уонна сэрэтэр: сөмөлүөт иһигэр баар быыһыыр тэрил — пассажирдар уонна экипаж куттала суох буолууларын хааччыйар тутаах мала буолар. Биир эмит тэрил суох буоллаҕына, сөмөлүөт комплектациятын чөлүгэр түһэриэхтэригэр диэри рейс олох да оҥоһуллубатыгар тиэрдиэн сөп. Быыһыыр тэрил биир да чааһын уоруу сокуону кэһиинэн буолар уонна холуобунай эппиэтинэс көрүллэр.