Мииринэйгэ АЛРОСА аахсыйалаахтарын сыллааҕы уопсай мунньахтара буолла

Мииринэйгэ АЛРОСА аахсыйалаахтарын сыллааҕы уопсай мунньахтара буолан ааспытын туһунан Ил Дархан Айсен Николаев МАХ-ханаалыгар иһитиннэрдэ. Мунньаҕы Айсен Николаев салайан ыытта.

— 2025 сыллааҕы хампаанньа үлэтин түмүктэрин уонна инники соруктары ырыттыбыт. Аан дойдуга алмаас салаатыгар уустук балаһыанньа уонна тас ыгыы баарын үрдүнэн, АЛРОСА бигэ туруктаах хаалар, оҥорон таһаарыы былааннарын толорор уонна Саха сирин экэниэмикэтин тирэҕинэн буолар.

Өрөспүүбүлүкэҕэ ордук улахан суолталааҕа — хампаанньа сүрүн үлэни биэрээччи быһыытынан хаалар. «Үлэлиир Саха сирэ. Каадырдар» бырагырааманан эрэ АЛРОСА тэрилтэлэригэр 5 тыһыынчаттан тахса Саха сирин олохтооҕо үлэҕэ киирдэ — бу бырагыраама кыттыылаахтарыттан бастыҥ көрдөрүү. Бу сыыппара кэннигэр — дьоҥҥо саҥа кыахтар, бигэ үлэ уонна дьиэ кэргэн сарсыҥҥы күҥҥэ эрэллэрэ.

АЛРОСА өрөспүүбүлүкэ сайдыытыгар улахан кылаатын киллэрэр. Ааспыт сылга социальнай инвестицияларга 8 млрд солкуобайтан тахса үп, ол иһигэр Кэлэр көлүөнэлэр тус сыаллаах пуондаларыгар харчынан көмө, ыытылынна. Социальнай эбийиэктэри, үөрэҕи, доруобуйа харыстабылын, култуураны, успуорду өйөөһүн уонна территориялары сайыннарыы — хампаанньа уонна Саха сирин уһун сыллаах бииргэ үлэлэһиилэрин биир тутаах хайысхата. Быйыл биһиги бу үлэни салгыыр саҥа биэс сыллаах социальнай-экэнэмиичэскэй сайдыы дуогабарын баттастыбыт.

Туспа бэлиэтиир наадалаах — экологическай боппуруос. 2025 сылга АЛРОСА аан дойдуга бастакынан оҥорон таһаарыы углерод нейтральноһын уонна бородууксуйатын отрицательнай углероднай суолун бигэргэттэ. Бу ситиһии Саха сиригэр эрэ буолбакка, бүтүн Арассыыйаҕа уонна аан дойду алмааһы хостуур салаатыгар улахан суолталаах. АЛРОСА салалтатыгар уонна кэлэктиибигэр Саха сирин сайдыытыгар үлэлэрин, эппиэтинэстэрин уонна кылааттарын иһин махтанабын, — диэн Ил Дархан суруйар.