Мииринэйгэ суоппар суол быһылааныгар киһини өлөрбүтүн иһин көҥүлэ быһылынна

Суут быһаарбытынан, Мииринэй оройуонун 39 саастаах олохтооҕо былырыын ыам ыйыгар «КАМАЗ 5814Т6» массыынанан айанын саҕалыырыгар тулатыгар куттал суоҕун болҕойон көрбөтөх. Ол түмүгэр тэрилтэ тиэргэниттэн тахсарыгар харабыл дьахтары тэбистэрбит. Ылбыт эчэйиититтэн дьахтар тута онно тыына быстыбыт.

Судаарыстыбаннай буруйдааччы этиитин болҕомтоҕо ылан, эр киһи РФ Холуобунай кодексатын 264-с ыстатыйатын 3-с чааһынан (РФ ХК 264 ыст. 3 ч.) буруйдааҕынан билиннэ. Кини 3 сылга  көҥүлэ быһылынна, ону тэҥэ 2 сыл устата тырааныспары ыытар бырааба быһылынна. Суут бириигэбэрэ сокуоннай күүһүгэр киирэ илик.