Мобильнай хирурдар Горнайга үлэлииллэр

Өрөспүүбүлүкэтээҕи 2 №-дээх балыыһа-– Мэдиссиинэ суһал көмөтүн киинин быраастара муус устар 20 күнүттэн Горнай улууһун оройуоннааҕы киин балыыһатыгар үлэлииллэр.

Кинилэр манна ыам ыйын 6 күнүгэр диэри үлэлээн, эндопротезированиеҕа, септопластикаҕа, варикозэктомияҕа 50-ча эпэрээссийэни оҥорор былааннаахтар. Ону сэргэ нейрохирург краниопластикаҕа эпэрээссийэлэри оҥоруоҕа. Билиҥҥитэ 15 эпэрээссийэ түмүктэннэ.

Мобильнай хирурдар икки нэдиэлэ анараа өттүгэр Мэҥэ Хаҥалас улууһугар 40-тан тахса киһини эпэрээссийэлээбиттэрэ. Санатан эттэххэ, «Хирургия мобильнай киинэ» инновационнай бырайыак 2024 сыл тохсунньутуттан Ил Дархан Айсен Николаев «О стратегических направлениях общественного здоровья и развития системы здравоохранения в Республике Саха (Якутия)» ыйааҕын олоххо киллэрии чэрчитинэн саҕаламмыта.

2024 сылга хирургия мобильнай киинин быраастара өрөспүүбүлүкэ 16 улууһугар 22 төгүл баран үлэлээбиттэрэ. Кинилэр улахан дьоҥҥо сүбэ-ама биэрбиттэрэ, 2662 киһи доруобуйатын чинчийбиттэрэ. Хирургияҕа барыта 677 үрдүк технологиялаах эпэрээссийэ оҥоһуллубута. Ол иһигэр олоҕу суһаллык быыһыыррга  34 эпэрээссийэ этэҥҥэ ааспыта.
Онтон 2025 сылга  быраастар өрөспүүбүлүкэ 16 улууһугар 26 төгүл сылдьыбыттара. Өрөспүүбүлүкэтээҕи 2 №-дээх балыыһа хирургияҕа мобильнай киинин быраастара 2025 сыл тохсунньу 1 күнүттэн  күн бүгүҥҥэ диэри 2 615 ыарыһах туругун бэрэбиэркэлээтилэр, онтон суһал көмөҕө наадыйар дьоҥҥо  935 ыарыһаҕы эпэрээссийэлээтилэр.
2026 сылга Киин быраастара өрөспүүбүлүкэ 15 улууһугар, ол иһигэр Эдьигээҥҥэ, Анаабырга, Аллайыахаҕа, Дьааҥыга, Булуҥҥа, Орто Халымаҕа тиийэн үлэлиир былааннаахтар.