Мохсоҕоллоох – Хачыкаат хайысханан паромнар сылдьан саҕалыахтара

Мохсоҕоллоох – Хачыкаат хайысханан паром сырыыта бүгүн, ыам ыйын 20 күнүгэр, аһыллыан сөп. Биэрэккэ улахан таһаҕас таһар массыыналар уочараттара үөскээбит. Бу туһунан Хачыкаат нэһилиэгин баһылыга Ирина Оболкина иһитиннэрдэ.

«Паром сырыыта, өрүскэ муус төһө хаалбытыттан тутулуктанан, ыам ыйын 20 күнүгэр аһыллыан сөп диэн сабаҕалыыбыт. Бээтинсэҕэ, ыам ыйын 22 күнүгэр, чопчу сырыыларын саҕалыахтара», — диэн кини кэпсээтэ.

Нэһилиэк баһылыга этэринэн, Хачыкаат биэрэгэр паром сырыыта саҕаланарын кэтэһэн улахан таһаҕас таһар массыыналар уочараттара үөскээбит. Быйылгы навигацияҕа Мохсоҕоллоох – Хачыкаат хайысхатыгар түөрт паром үлэлиэҕэ: «СПЖ-107», «СПЖ-99», «Агат» уонна «Виктория-2».

Дьокуускай – Аллараа Бэстээх сырыыны киллэрэн туран, тарыыптар билигин официальнайдык чопчу биллэриллэ иликтэр.

Санаттахха, нэдиэлэ бүтүүтэ Дьокуускай – Аллараа Бэстээх хайысханан бастакы тэхиниичэскэй сырыыны ыытар былааннанар.