Москва устудьуоннара Хатырыкка кэлэн саха тылын үөрэтэллэр

Быйыл Нам улууһун  Хатырык сэлиэнньэтигэр  бэһис сылын  номнуо алтыс төгүлүн Москватааҕы Национальнай чинчийэр университет “Экономика үрдүкү оскуолатын” гуманитарнай факультетын  аспираннара, устудьуоннара  уонна преподавателлэрэ саха  тылын чинчийэ, үөрэтэ кэллилэр.

Тоҕо  алтыс төгүлүн диэтэххэ, кинилэр 2022 сыллаахха сайын уонна кыһын, иккитэ кэлэ сылдьыбыттар эбит. Кинилэри филологическай наука кандидаттара  Алексей Андреевич Козлов уонна  Алексей Николаевич Дунцов салайан илдьэ сылдьаллар. Биэс  сыл анараа өттүгэр кэлсибит устудьуоннарбыт  ити университеттарыгар аспирант буолбуттар.

Мин быйыл кинилэри кытта иккис сайыммын дьарыктанным. Уонна бэйэм төрөөбүт тылбынан киэн туттуум күн-түүн күүһүрэн иһэриттэн үөрэбин. Үксүн кинилэр туохтуур тыл араас түгэҥҥэ хайдах туттулларын, хайдах сөпкө саҥарылларын, үөрэтэллэр. Сороҕор бэйэм да буккуллан ылыахпар дылы мускуйан, эрийэн үөрэтэ сатыылларыттан үөрэбин, билбэтэхпин биллэхпинэ сонньуйан да ылабын.

Бу университет биһиги эрэ тылбытынан дьарыктанар буолбатах. Араас кыра омуктар тылларын барытын үөрэтэллэр эбит. Салайааччылара Алексей Андреевич:  «Элбэх омук тылын үөрэттим да, сахалар төрөөбүт тылгытынан холкутук кэпсэтэргититтэн, суруйаргытыттан, оҕолоргутугар үөрэтэргититтэн сөҕөбүн уонна астынабын»,– диир. Мордвин  омуктар тыллара сүппүтэ ырааппытын, билигин оҕолор оскуолаҕа омук тылын курдук үөрэтэллэр диэн хараастар.

Мин кинилэртэн бу үөрэппит тылларгытын салгыы хайдах үөрэтэҕит диэбиппэр, күһүн үөрэхтэригэр  тиийдэхтэринэ   нэдиэлэ ахсын мустан тугу, туох тылы үөрэппиттэрин ырыталлар эбит. Өйдөөбөтөхтөрүн Хатырык оскуолатын саха тылын учууталыттан Екатерина Спартаковнаттан, манна үөрэтэр консультаннарыттан ыйытан чуолкайдыыллар. Бу темаларынан араас учуонай сэбиэттэргэ кытталлар, научнай ыстатыйалары бэчээттэтэллэр эбит.

Экспедицияларын түмүктүүр күннэрин иннинэ олорбут спортивнай саалаларын  сууйан-сотон, ас астаан консультаннарын (кинилэр биһигини учууталларбыт диэн ааттыыллар) чэйдэтэр үгэстээхтэр. Алексей Андреевич олус минньигэс сакалааттаах брауни астаан күндүлүүрүн сөбүлүүр. Быйыл да  үгэс  кэһиллибэтэ. Үөрэнээччилэрбит саҥа үөрэппит Аркадий Алексеев  мелодиятыгар “Саха үҥкүүтэ” ырыатын ыллаан иһитиннэрдилэр. Биһиги эмиэ норуот ырыаларын ыллаан иһитиннэрдибит. Ирэ-хоро сахалыы, нууччалыы сэһэргэстибит. Сахалыы остуол оонньууларын үөрэтэн оонньоон, астынан-дуоһуйан эһиил эмиэ кэлээриҥ  диэн алгыы хааллыбыт.

Тапталлаах, хайҕаллаах сахам тыла барахсан өрүү сайда тур!

Л.И.Васильева, Хатырык нэһилиэгин бибилэтиэкэтин  үлэһитэ