Муома улууһугар булчут сүппүт

Ыам ыйын 26 күнүгэр Муома улууһун Биир кэлим диспетчерскэй сулууспатыгар (ЕДДС) биллэрбиттэринэн, ыам ыйын 23 күнүгэр 1953 с.т. эр киһи Буор Сыһыыттан 18 биэрэстэлээх Оҕо төрөөбүт диэн сиргэ тыаҕа соҕотоҕун барбыт.

Булчут ыам ыйын 25 күнүгэр 16:00 чааска сибээскэ тахсан, бөһүөлэккэ төннөн иһэбин диэбит уонна онтон ыла туох да биллибэтэх.

Ыам ыйын 26 күнүгэр көрдүү барбыт волонтердар бөлөхтөрө (2 вездеходунан) уу таһыма үрдүк буолан, күргэни туораабакка, төннөргө күһэллибиттэр. Ыам ыйын 27 күнүгэр көрдөөһүн үлэтэ салҕаммыт. Киэһэ 22:00 чааска 6 киһилээх бөлөх икки вездеходунан уонна квадрокоптердаах айаннаабыт. Түүнү быһа көрдөөн баран, ыам ыйын 28 күнүгэр сарсыарда 09:30 туох да түмүгэ суох төннөн кэлбиттэр. Билиҥҥи туругунан көрдөөһүн үлэтэ салҕанар. Быһылаан Саха сиринээҕи Быыһыыр сулууспатын хонтуруолугар турар.