Мытаахха —  Ньурбаттан “Ийэ сүрэҕэ” испэктээк

Быйыл Арассыыйаҕа Норуоттар сомоҕолоһууларын, Саха сиригэр Култуура сылларынан биллэриллибит. Ол чэрчитинэн, Ньурбатааҕы драматическай тыйаатыр Куорунайга Дьиикимдэ бөһүөлэгэр “Ийэ сүрэҕэ” испэктээги көрдөрдө.

Тыйаатыр  ааспыт кэмнэрин билсистэххэ, аан бастаан Ньурбаҕа 20 –с үйэ 40 –ус сылларыгар көһө сылдьар холкуоһунай тыйаатыр тэриллэн үлэтин саҕалаабыта. Ол быыһыгар тохтуу сылдьан баран 1966 сыллаахха икистээн тыын ылан, Ньурбатааҕы драматическай тыйаатыр быһыытынан айымньылаахтык үлэлии сылдьар.

Сааскы сылаас тыынынан илгийэр, күн чаҕылыччы көрөр наҕыл кэмҥэ, Калмык норуодунай суруйааччыта Алексей Балакаев суруйуутунан “Ийэ сүрэҕэ” туруорууну сэргэхсийэ көрдүбүт. Испэктээҕи көрө олорон норуокка тапталга икки сүрүн: сырдык уонна хараҥа дьайыыларын утарыта киирсиилэрин туоһулуур көстүүлэр көһүннүлэр. Ол курдук, киэҥ нэлэмэн истиэпкэ дьадаҥы маныыһыт уол сүрэҕэ сөбүлүүр кыыһын кытта холбоһорго санаатын атын дьаарай санаалаах сарыысса араас албастарынан бэйэтин туһатыгар тарда сатыырын, сүрэҕэ ылынар уолугар бэриниилээх кыыс уонна ыраас санаалаах уобарастар көмөлөрүнэн бииргэ буолууларын ситиспиттэрин көрдүбүт.

Испэктээккэ сүрүн оруоллары 2025 сыллаахха “Уот Дьулустаан” телесериал киинэтигэр наҕыл көрүҥнээх, ырааҕы, киэҥи өтөн толкуйдуур ыра санаалаах, хамначчыттар хара дьиэлэригэр сүбэһит эбээлэрин уобараһын чаҕылхайдык арыйан көрөөччүлэр киэҥ биһирэбиллэрин ылбыт Саха Өрөспүүбүлүкэтин үтүөлээх артыыһа Майя Слепцова, Саха Өрөспүүбүлүкэтин  үтүөлээх артыыската Венера Никитина, СӨ култууратын туйгуна Сардаана Михайлова, СӨ култууратын туйгуна Олег Коноцюк, Саргылаан Третьяков, СӨ култууратын туйгуна Вера Лазарева, СӨ култууратын туйгуна Леонид Анисимов, испэктээх сүрүн дьоруойун Пүрбэ-ни оонньообут Мытаахтан хаан тардыылаах биир дойдулаахпыт Ефрем Татаринов бэйэлин оруолларын көрөөччүлэргэ тиийимтиэ гына толордулар. Испэктээх туруорааччы режиссера СӨ искусствотын үтүөлээх деятелэ Юрий Макаров, худуоһунньук Мария Тартакынова, уот-күөс өттүнэн киэргэтээччи Кэптинтэн төрүттээх биир дойдулаахпыт СӨ туйгуна Константин Михайлов айымньылаахтык үлэлээбиттэрэ көһүннэ.

Түмүккэ, Ньурба тыйаатырын артыыстара сааскы бырааһынньыгынан кэрэ аҥаардары эҕэрдэлээн туран ырыа бэлэхтээтилэр, онтон култуура эйгэтигэр үлэлиир кэрэ аҥаардарга сибэкки дьөрбөтүн туттардылар.

Драмтыйаатыр артыыстарыгар, үлэһиттэригэр үрдүктэн үрдүк чыпчааллары дабайан, көрөөччүлэр биһирэбиллэрин ылар испэктээктэри киэҥ дьүүлгэ таһааран иһэллэригэр баҕарабыт.

Николай Осипов, РФ суруналыыстарын сойууһун чилиэнэ. Дьиикимдэ бөһүөлэгэ.