Надежда Филиппова: “Билим Трансарктическай тырааныспар көрүдүөрүн бырайыактааһын төрүтүнэн буолуоҕа”

“РНА Сибиирдээҕи салаатын Саха сиринээҕи научнай киинэ” федеральнай чинчийэр киин  генеральнай дириэктэрин билимҥэ солбуйааччы Надежда Филиппова “Якутия 24” ханаалга “Актуальное интервью” бырагыраамаҕа кытынна.  Кэпсэтии сүрүн тиэмэтинэн РФ бэрэсидьиэнэ Владимир Путин 2050 сылга диэри национальнай суолталаах соругунан ааттаабыт Трансарктическай тырааныспар көрүдүөрүн олоххо киллэриигэ билим оруола буолла.

Трансарктическай көрүдүөрү сайыннарыы быйыл араас эрэгийиэнтэн уонна дойдуттан 500-тэн тахса эспиэри түмэр Хотугу пуорум биир тиэмэтинэн буолуоҕа.

Надежда Филиппова эппитинэн, билим Арктикаҕа ханнык баҕарар улахан инфраструктурнай бырайыагы олоххо киллэрэргэ булгуччулаах усулуобуйанан билиниллиэҕэ.

«Хотугу сири бырамыысыланнас да, тырааныспар да өттүнэн баһылааһын туһунан билимҥэ олоҕурбукка эрэ  кэпсэтэр кыахпыт суохпут. Билим Саха сиринээҕи киинэ Хотугулуу-Илиҥҥи федеральнай университеты  уонна дойду атын билимҥэ сүрүннүүр былаһааккаларын кытары биир кэлим эспэртиисэни ыыталлар уонна көрүдүөр сүрүн хайысхаларын моделларын оҥороллор. Бу Хотугу муора суола эрэ буолбакка, өрүс, массыына суоллара, логистическай түмүктэр”, — диэтэ учуонай.

Надежда Филиппова Саха сирин билимин кыаҕа  араас хайысханы – космофизикаттан тыа хаһаайыстыбатыгар тиийэ хабарын бэлиэтээн эттэ.

“Биһиги Арктика хас биирдии оройуонун уратытын учуоттаан туһаныллар  ньыманы булуохтаахпыт. Манна дэгиттэр быһаарыылар баар буолар кыахтара суох – Саха сирэ, Чукотка, Ямала бэйэлэрэ ураты усулуобуйалаахтар уонна соруктаахтар. Онуоха билим чопчу харданы биэриэхтээх”, — диэн Надежда Филиппова түмүктээн эттэ.