«Нам» суолун 70-74-с км учаастагын өрөмүөнэ болдьоҕуттан эрдэ түмүктэннэ

Арассыыйа Бэрэсидьиэнэ Владимир Путин көҕүлээбит «Олох-дьаһах инфраструктурата» нацбырайыагынан, Нам улууһун Никольскай сэлиэнньэтинэн ааһар «Нам» трасса 70-с килэмиэтириттэн 74-с килэмиэтиригэр диэри өрөмүөнэ болдьоҕуттан икки ый эрдэ түмүктэннэ. Бу туһунан Саха сиринээҕи Массыына суолларын управлениетыгар иһитиннэрдилэр.

Суол бэлиэлэрин уруһуйдаабыттарын кэннэ, сотору кэминэн Саха сиринээҕи Массыына суолларын управлениетын экспиэрдэрэ кыттыылаах тутар хамыыһыйа үлэлиэҕэ.

Суолу өрөмүөннээһин быйыл кулун тутар ыйтан саҕаламмыта. «Сэттэ» ДРСУ ХЭТ (ООО) тутааччылара урукку  аспаалы кыһан ылбыттара, ол кэннэ суолу саҥардыбыттара. Ол кэнниттэн икки араҥанан асфальтобетону тэлгэттилэр, суол кытыытыгар хааччахтары, оптуобус тохтобулларын уонна сатыы дьон туоруур сирдэрин оҥордулар.

Ааспыт сыл түмүгүнэн «Олох-дьаһах инфраструктурата» нацбырайыак чэрчитинэн Саха сиригэр 130,69 км суол үлэҕэ киирбитэ, олортон 109,47 килэмиэтирэ — эрэгийиэннээҕи таһымнаах суоллар. Үлэҕэ киирбит суоллар 85,74 %-на, ол иһигэр 37,1 км тирэх суол ситимэ нормативнай турукка тиэрдиллибитэ. Дьокуускай куорат агломерациятыгар 11,88 км уулусса-суол ситимэ тутуллубута уонна өрөмүөннэммитэ, оттон нормативнай ирдэбилгэ эппиэттиир суол өлүүтэ 85 %-ҥа тиийбитэ.

Оттон 2026 сылга «Олох-дьаһах инфраструктурата» нацбырайыагынан өрөспүүбүлүкэҕэ 95 килэмиэтиргэ чугаһыыр суолу нормативнай турукка тиэрдэр былааннаахтар.