Научнай роликтары оҥорорго оҕолорго күрэс ыытыллар

6-тан 18-гар диэри саастаах оскуола үөрэнээччилэрэ үс мүнүүтэ иһигэр наука туһунан кэпсээн, бириистэри уонна РУДН-ка киирэргэ эбии бааллары ылыахтарын сөп. Куонкурус кинилэргэ бэйэлэрин кэлин эдэр учуонай быһыытынан биллэрэллэригэр, наукаҕа талааннарын арыйалларыгар,  бырайыактарын уонна идиэйэлэрин көрдөрөллөрүгэр кыаҕы биэрэр.

Арассыыйа бары муннуктарыттан оскуола үөрэнээччилэрэ бэйэлэрин научнай-чинчийэр роликтарын көрдөрүөхтэрэ, билиилэрин үллэстиэхтэрэ уонна уустук тиэмэлэри судургу, умсугутуулаах тылынан быһаарарга холонуохтара. Быйыл куонкуруска саҥа партнердар кыттыстылар, оттон финалга тахсыбыттары бириистэри таһынан, Патрис Лумумба аатынан Арассыыйатааҕы норуоттар доҕордоһууларын университетыгар (РУДН) киирэргэ эбии бааллар күүтэллэр.

«Билэҕин? Үөрэт!» научнай-чинчийэр видео куонкуруһа наукаҕа, технологияҕа уонна контены оҥорууга интэриэстээх 6-тан 18-гар диэри саастаах оскуола үөрэнээччилэрин түмэр. Кыттааччылар 1-тэн 3 мүнүүтэҕэ диэри уһуннаах бэйэлэрин видеоларын бэлэмнээн баран, наука.рф/үөрэт саайтка таһаарыахтаахтар. Ролигы оҥороругар үөрэнээччи наука идиэйэтин интэриэһинэй уонна өйдөнүмтүө көрүҥҥэ киллэрэргэ көмөлөһөр настаабынньыгы бэйэтэ талыан сөп.

Видеороликтары тутуу 2027 сыл кулун тутарыгар диэри салҕаныаҕа. Куонкурус алтыс сезонун түмүгэ 2027 сыл муус устарыгар таһаарыллыаҕа. Кыайыылаахтары умсугутуулаах айаннар, аныгы тиэхиньикэ бириистэр уонна РУДН киирээччилэригэр эбии бааллар күүтэллэр.

«Куонкурус ыытыллыбыт биэс сылын устатыгар кыттааччылар 12 тыһыынчаттан тахса видеоролигы оҥордулар. Быйыл биһиэхэ саҥа партнердар уонна номинациялар баар буоллулар. Оҕолор бэйэлэрин наукаҕа уонна айар интэриэстэригэр сөп түбэһэр тиэмэни талыахтарын сөп. Холобур, биһиги куораттарбытыгар олоҕу ордук табыгастаах, оттон аһы ордук туһалаах уонна хаачыстыбалаах оҥорор технологиялары кэпсиэхтэрин, сир баайын хостуурга уонна таҥастыырга аныгы быһаарыылары көрдөрүөхтэрин, эбэтэр бэйэлэрин наукаҕа эспэримиэннэрин көрдөрүөхтэрин, оннооҕор бэйэлэрэ айбыт тэриллэрин билиһиннэриэхтэрин сөп», — диэн «Национальные приоритеты» генеральнай дириэктэрэ София Малявина быһааран биэрдэ.

Бастакы киирбит роликтары барыларын эспиэрдэр сэбиэттэрэ сыаналыаҕа, кинилэр куонкурус быраабылаларыгар уонна талыллыбыт номинацияҕа сөп түбэһиилэрин бэрэбиэркэлиэхтэрэ, научнай уонна креативнай өрүттэрин сыаналыахтара. Ол түмүгэр 162 полуфиналиһы кылгас испииһэккэ киллэриэхтэрэ: хас биирдии номинацияҕа 27-лии кыттааччы. Кинилэртэн кыайыылаахтары дьүүллүүр сүбэ түөрт киритиэрийинэн быһаарыаҕа: тиэмэни баһылааһын уонна арыйыы, идиэйэ уратыта, визуальнай хаачыстыба уонна монтаж, матырыйаалы биэрии таһыма. Хас биирдии алта номинацияҕа бириистээх миэстэлэр үс сааһынан категорияҕа: алын, орто уонна үрдүкү кылаастарга туттарыллыахтара.

Инньэ гынан, 54 финалга тахсыбыттан 18 кыайыылаах алта тиэмэнэн номинацияҕа быһаарыллыаҕа, ону тэҥэ бастыҥ настаабынньык, бастыҥ оскуола уонна бастыҥ эрэгийиэн. Кыайыылаахтары барыларын, ол иһигэр бастыҥ настаабынньыгы уонна бастыҥ оскуоланы, наҕараадалааһын үөрүүлээх сиэригэр-туомугар ыҥырыахтара.