“Наука 0+” бэстибээл үрдүк таһымнаахтык буолан ааста

Ааспыт нэдиэлэҕэ хас даҕаны күн тэбэн туран Саха сиригэр дойду үрдүнэн ыытыллар “Наука 0+” бэстибээл буолан ааста. Дьокуускайга букатын аҕыс былаһаакка үлэлээтэ.

“Арассыыйа – мин устуоруйам” түмэлгэ саамай элбэх киһи муһунна быһыылаах. Киирэр аантан саҕалаан быыстапка, маастар-кылаас, лиэксийэ арааһын тэрийдилэр. Үчүгэйэ диэн оҕо сааһынан, интэриэһинэн бэйэтигэр сөптөөх дьарыгы талар кыаҕа үөскээтэ. Оҕолор түргэнник ситэр аска кутуллар күөх эбилиги (микрозелень) биһирээн олортулар, бэчиэнньэ кырааскалаатылар, уруһуйдаатылар, бастакы суһал көмөнү оҥоруу туһунан билистилэр, бэйэлэрэ ытарҕа оҥордулар, остуол оонньуутун арааһын оонньоотулар.

Тыа хаһаайыстыбатын тиэхиньикумун устудьуоннара: “Овоскоп приборунан сымыыт хаачыстыбатын, сымыыт инкубацияҕа  барсарын дуу, суоҕун дуу бэрэбиэркэлиибит. Инкубациялааһын бастакы күнүгэр төрүөх көстүбэт, нэдиэлэнэн кыратык көстөр. Төрүөх баар сибикитин биллэхпитинэ салгыы инкубацияҕа туруорабыт. 21 күнүнэн чоппууска тахсар” — диэн устудьуоннар кэпсииллэр. Онтон дьиэтээҕи усулуобуйаҕа сымыыты хайдах бэрэбиэркэлиэххэ сөбүн ыйыппыппар: “Үчүгэй сымыыкка салгын, хаан суох буолуохтаах. Хос уотун умулларан баран остуолга ууруллар кыра лаампа эбэтэр банаар үрдүгэр тутан судургутук бэрэбиэркэлиэххэ сөп”, – диэн быһаараллар. Онон куорат үөрэнээччилэрэ сымыыт хаачыстыбатын уонна чоппуусканы хайдах таһаарыахха сөбүн билистилэр.

Арктикатааҕы агротехнологическай университет үлэһиттэрэ, устудьуоннара бэстибээли букатын үрдүк таһымнаахтык тэрийбиттэр. Биир киэҥ саала иһигэр маастар-кылаас, квест-оонньуу, уопут эгэлгэтэ элбэх.  Биологияны, химияны сэҥээрэр оҕолор бу күн күннээтилэр. Устудьуоннар  тулалыыр эйгэҕэ сыһыаннаах биэс ыстаансыйанан оонньуу ыыттылар. Кыайбыттар бириистэрэ – кэмпиэт. Аны оҕолор хирург оруолун толорон анал инструмены туһанан тигэн көрдүлэр. Үүнээйи, үрүҥ аһылык эргэрбитин, аһыйбытын, кыыл хаанын анал прибордарынан, микроскобунан көрдүлэр. Дьиэтээҕи усулуобуйаҕа сибэкки буорун хаачыстыбатын хайдах бэрэбиэркэлиэххэ сөбүн биллилэр. Онтон кырачааннар тыыннаах баҕаны илиилэринэн тутан үөрүүлэрэ үгүс. Тэрийээччилэр төһө даҕаны хомунан саҕалаабыттарын иһин, бүтэһиккэ диэри элбэх оҕо сырытта. Уолаттар сүрүннээн квадрокоптеры көтүтэн, VR ачыкыны кэтэн баран “тыаҕа үлэлээн” сүргэлэрэ көтөҕүлүннэ.

“Наука 0+” бэстибээлгэ өссө элбэх оҕо сылдьыаҕын, бастакы чиэппэр бүтүүтэ, сыананы тупсарыы сүпсүлгэнэ буолан, баҕалаах даҕаны үөрэнээччилэр кыайан кыттыбакка, көрбөккө хааллылар. Инникитин тэрээһини күһүҥҥү сынньалаҥ кэмигэр көһөрөн биэрдэллэр бэрт этэ диэн төрөппүттэр баҕа санааларын этэллэр.