Навигация саҕаланыаҕыттан 924 тыһ. туоннаттан тахса таһаҕас тиэрдилиннэ

Навигация саҕаланыаҕыттан Саха сирин наадыйыытыгар, олох-дьаһах хааччыйыытыгар аналлаах 958 тыһ. туонна таһаҕас тиэйилиннэ, эбэтэр былаантан 94,9% туолла. Былааннаммыт кээмэйтэн 91,6%-на, ол эбэтэр 924,6 тыһ. туонната тиэрдилиннэ. Бу туһунан Гражданскай оборуонаҕа уонна нэһилиэнньэ олоҕор-дьаһаҕар куттал суох буолуутун хааччыйыыга министиэристибэтигэр иһитиннэрдилэр.

Санатан эттэххэ, быйыл навигацияҕа Саха сирин наадыйыытыгар таһаҕаһы тиэрдии былаана 1 009,5 тыһ. туоннаҕа тэҥнэһэр. «Өрөспүүбүлүкэ Арктикатааҕы улуустарыгар таһаҕаһы тиэрдии министиэристибэ нэдиэлэ аайы ыытар кэтээн көрүүтүгэр баар. Тус-туспа боппуруостарга таһаҕаһы таһааччылары, ыытааччылары уонна былаас уорганнарын кытта күн аайы үлэ мунньахтарын ыытабыт. Бүгүҥҥү мунньах түмүгүнэн биһиги хаһаайыстыбаннай субъектартан номнуо тиэрдиллибит уонна суолга иһэр таһаҕастар кээмэйдэрин туһунан түмүк иһитиннэриини биэрэллэригэр көрдөстүбүт, кыһыҥҥы кэмҥэ суудуналар куттала суох турууларыгар туспа болҕомтобутун уурдубут», – диэн Саха сирин Гражданскай оборуонаҕа уонна нэһилиэнньэ олоҕор-дьаһаҕар куттал суох буолуутун хааччыйыыга миниистирин солбуйааччы Никита Павлов бэлиэтээтэ.

Навигация кэмигэр уу таһыма олус намтаабытынан сибээстээн, Дьааҥы уонна Индигиир өрүстэригэр ордук уустук быһыы-майгы үөскээтэ. Ол эрээри тиэрдиллибэтэх кээмэйдэри толуйарга дьаһаллар номнуо ылылыннылар уонна олоххо киирэллэр. Бу өрүстэр тардыыларыгар баар улуустарга былааннаммыт уматык уонна чох сорох өттө кыһыҥҥы кэмҥэ массыынанан тиэрдиллиэҕэ. Бүгүҥҥү туругунан, массыына кыһыҥҥы суоллара бигэтик арыллыахтарыгар диэри, бары нэһилиэнньэлээх пууннар энергоресурсаларынан толору хааччылыннылар.

Уус Куйга олохтоохторун аһылыгынан хааччыйыыга туспа болҕомто уурулунна. Авиатырааныспарынан тиэрдии тэрилиннэ: маҥнайгы таһаҕас рейсэ бүгүн номнуо толорулунна, иккиһин бу нэдиэлэҕэ ыытар былааннаахтар. Уу таһыма намыһаҕыттан өрүһүнэн тиэрдиллибэтэх аһылык табаардара Тиксии пуордугар суһаллык тиэрдилиннилэр.

Саха сирин Арктикатааҕы улуустарыгар Хотугу таһаҕас тиэрдиитин хас да таһааччы  хааччыйар. Суһал кэтээн көрүү дааннайынан, Арктика бөлөх улуустарынан 323,2 тыһыынча туонна былааннаахтан 302,7 тыһыынча туонна таһаҕас тиэйилиннэ, 285,5 тыһыынча туонна тиэрдилиннэ.