Нерюнгри уонна Алдан улуустарыгар бэнсиини атыылааһыҥҥа хааччахтааһын бу нэдиэлэҕэ уһуллуон сөп

Саха сирин Ил Дархана Айсен Николаев атырдьах ыйын 3 күнүгэр «Якутия 24» уонна «Саха» НКИХ ханаалларга «Якутия, вперед!» биэриигэ Нерюнгри уонна Алдан улуустарыгар уматыкка  сыһыаннаах тыҥааһыннаах балаһыанньа сотору кэминэн көнүөхтээҕин туһунан иһитиннэрдэ. Бу нэдиэлэҕэ Соҕуруу улуустарга ньиэп баазаларыттан уматыгы биэрии нуормата үрдүүрэ күүтүллэр.

Ил Дархан бэлиэтээбитинэн, уматыгынан хааччыйыыга күүстээх үлэ барда.

«Арассыыйа Бырабыыталыстыбатын бэрэссэдээтэлин солбуйаччы Александр Новакка мин  этии киллэрбитим уонна биһиги суһал ыстааппыт үлэтин түмүгүнэн, билигин «Роснефть» уонна «Саханефтегазсбыт» икки ардыларыгар сөбүлэҥ түһэрсиллэр. Сотору кэминэн Саха сирин соҕуруу өттүгэр уматыгы тиэйии саҕаланыаҕа. Хас да тыһыынча туонна 92-с уонна 95-с мааркалаах бэнсиин тиэйиллиэҕэ. Тиэйии дьиҥнээхтик саҕаламмытын көрөөт да, биһиги Нерюнгри уонна Алдан улуустарыгар  тыҥааһыннаах балаһыанньаны устуохпут, ньиэп баазаларыттан уматыгы биэрии нуорматын хайаан да үрдэтиэхпит. Бу дьаһал атырдьах ыйын бастакы нэдиэлэтигэр олоххо киириэ диэн олус эрэнэбин», — диэтэ Айсен Николаев.

Санатан эттэххэ, урут өрөспүүбүлүкэҕэ уматыгы тэҥҥэ тиэрдэр туһуттан, атыылааһыҥҥа быстах кэмҥэ хааччахтар киирбиттэрэ. Былаас балаһыанньаны кытаанах хонтуруолга тутар, Хотугу таһаҕаһы тиэйии чэрчитинэн уматыгы тиэрдии кээмэйин улаатыннарар үлэ салҕанар.

Ил Дархан этэринэн, дойду үрдүнэн уматыкка сыһыаннаах балаһыанньа биллэрдик тубуста, Саха сирин сайаапкалара, ордук хотугу таһаҕаска, толорулуннулар. Бу сыалга өрөспүүбүлүкэҕэ барыта 105,5 тыһыынча туонна бэнсиин, 71,9 тыһыынча туонна дизельнэй уматык уонна 5,5 тыһыынча туонна сэлээркэ киириэҕэ.

Оттон Дьокуускай куоракка Окружной шоссеҕа сапыраапкаҕа бэнсиини туох да хааччаҕа суох  атыылыылларын санатабыт.