Нерюнгрига оҕолорго аналлаах социальнай тэрилтэ саҥа куорпуһун тутуута саҕаланна

Нерюнгри оройуонун Серебряный Бор бөһүөлэгэр Өрөспүүбүлүкэтээҕи оҕолорго аналлаах социальнай тэрилтэ саҥа куорпуһун тутуутун үлэтэ саҕаланна. Үөрүүлээх тэрээһиҥҥэ Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Георгий Степанов кытынна.

РФ «Гражданнары социальнай өйөбүл» судаарыстыбаннай бырагырааматын чэрчитинэн тутуллар саҥа куорпус доруобуйаларыгар хааччахтаах оҕолорго олорорго аныгылыы усулуобуйаны тэрийиэҕэ уонна улахан дьон олоҕор бэлэмнэнэллэригэр эбии кыахтары биэриэҕэ.

Саха сирин Бырабыыталыстыбатын бэрэссэдээтэлин солбуйааччы Георгий Степанов этэринэн, бу түбэлтэ бүтүн эрэгийиэн үрдүнэн күүтүүлээх сонун буолар.

«Биһиги бары тутуу саҕаланыытын олус да күүттүбүт. Икки сылынан оҕолорбут саҥа, сырдык, сылаас, аныгы ирдэбиллэргэ толору эппиэттиир дьиэҕэ олоруохтара диэн былаанныыбыт. Дойду Бэрэсидьиэнэ Владимир Путин көҕүлээбит “Дьиэ кэргэн” национальнай бырайыак сыалларын-соруктарын салгыы олоххо киллэрэн, оҕолор ханна олороллоруттан, иитиллэллэриттэн тутулуга суох, дьиҥнээх өйөбүлү уонна харысхалы билэллэрин ситиһиэхтээхпит», — диэн Георгий Степанов бэлиэтээтэ.

Саҥа куорпус бырайыага олорууну эрэ буолбакка, көмө саҥа көрүҥнэрин сайыннарыыны эмиэ көрөр. Саха Өрөспүүбүлүкэтин Үлэҕэ уонна социальнай сайдыыга миниистирэ Елена Волкова иһитиннэрбитинэн, тэрилтэ полустационарнай буолара былааннанар.

«Стационарнай көмөнү таһынан, саҥа дьиэҕэ күнүскү эрэсииминэн көмөнү сайыннарыахпыт, бу бырагыраама чэрчитинэн оҕолор да, кинилэр төрөппүттэрэ да сөптөөх көмөнү ылыахтара», — диэн Елена Волкова үллэһиннэ.

Саҥа корпус 3,5 тыһыынча квадратнай миэтэрэттэн тахса иэннээх икки мэндиэмэннээх дьиэ буолуоҕа. Бырайыак архитектурата 4-тэн 18-ка диэри саастаах иитиллээччилэр бэйэлэрэ бэйэлэрин көрүнэргэ үөрэнэллэригэр аналлаах студия-кыбартыыралары көрөр.

«Студия-кыбартыыраларга биһиги иитиллээччилэрбит олоруохтара, уопсастыбаҕа киириэхтэрэ уонна улахан дьон олоҕор үөрэниэхтэрэ. Кинилэргэ бу судургу тэрилтэ буолбакка, дьиҥнээх дьиэнэн буолуоҕа», — диэн өрөспүүбүлүкэтээҕи оҕолорго аналлаах социальнай тэрилтэ дириэктэрэ Оксана Гнилевская кэпсээтэ.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата

Сиһилии: https://www.sakha.gov.ru/news/54935