Ыар буруйу оҥорууга буруйданааччыны силиэстийэ кэмигэр хаайарга быһаардылар

Арассыыйа Силиэстийэлиир кэмитиэтин Саха сиринээҕи управлениетын Нерюнгри куораттааҕы силиэстийэлиир отдела бу иннинэ хаста да сууттаммыт 41 саастаах Нерюнгри олохтооҕор Арассыыйа Холуобунай кодексын 111-с ыстатыйатын 4-с чааһынан (киһи доруобуйатыгар соруйан ыарахан эмсэҕэлээһини оҥоруу, онтон сылтаан, сэрэҕэ суохтан өлүүгэ тиэрдии) буруйу оҥоруунан холуобунай дьыаланы көбүттэ.

Силиэстийэ быһаарбытынан, 2026 сыл алтынньы 6 күнүгэр буруйданааччы кыбартыыратыгар кини уонна доҕоро арыгы иһэн баран айдаарсыбыттар, ол түмүгэр дьиэ хаһаайына эмсэҕэлээччини төбөтүгэр сутуругунан хаста да охсубут.

Ыаллыы олорор кыбартыыра олохтоохторо суһал көмөнү уонна быраабы араҥаччылыыр уорган үлэһиттэрин ыҥырбыттар. Ол эрээри, эмсэҕэлээччи ол күн балыыһаҕа киирэн ыарахан эчэйииттэн өлбүт.

Буруйдаах эр киһини быһылаан тахсыбыт сириттэн туппуттар, силиэдэбэтэл киниэхэ буруйдуур дьыаланы көбүппүт, онтон суут кинини хаайар туһунан силиэстийэ көрдөһүүтүн ылыммыт.

Холуобунай дьыаланы силиэстийэлээһин салҕанар.