Николай Бочков: «Амма улууһун чоҕо суох хаалларыахпыт суоҕа»

Амма улууһун хочуолунайдарыгар чох саппааһа бүппүт үһү диэн иһитиннэрии бу күннэргэ социальнай ситимнэринэн үгүстүк тарҕанна.

Туһааннаах боппуруоһунан СӨ бырабыыталыстыбатын бэрэссэдээтэлин бастакы солбуйааччыта Николай Бочков:

— Улуус хочуолунайдарыгар чох Харбалаахтааҕы разрезтан сылы эргиччи  массыына суолунан кэлэр. Чох күн аайы кэлэр. Онон хааччыллыыны сыаналыырга чох билигин баарын эрэ буолбакка, кини күн аайы кэлэрин эмиэ учуоттуур наада.

Аны  тиэйэн-аҕалан биэрэр «Төлөн» АУо үбүн-харчытын туругар,  чоҕу тиэйтэрбит тэрилтэлэр  мунньуллубут иэстэрэ дьайда. Бу боппуруоһу соторутааҕыта оттук сезонугар анаммыт сүбэ мунньахха көрдүлэр. Ол түмүгүнэн  тэрилтэ үбүн балаһыанньатын бигэтитии  туһунан быһаарыылар ылылыннылар. Наадалаах үп сотору кэминэн ыытыллыаҕа.

Амма улууһун чоҕо суох хаалларыахпыт суоҕа. Өрөспүүбүлүкэ ОДьКХ уонна энергетика министиэристибэтин, улуус дьаһалтатын уонна ресурсаларынан хааччыйар тэрилтэлэри кытта хочуолунайдары чох саппааһынан кэмигэр толорорго, тиэйиигэ, олохтоохтору эрэллээхтик сылааһынан хааччыйыыга, иэһи суох оҥорууга салгыы үлэлиибит, — диэн эттэ.