НЛО буолбатах: Илон Маск 27 устуука «Starlink» спутнигын космоска таһаарда

Куйаар ситимигэр тарҕаммыт сонуннарга олоҕурдахха, атырдьах ыйын 22 күнүгэр, субуотаҕа, Илон Маск 27 устуука «Starlink» спутнигын космоска таһаарбыт. Бу аппарааттар үс хонук устата 250 килэмиэтир кэриҥэ үрдүккэ «паровоз» курдук субуруһан устан, Арассыыйа киин өттүн, ол иһигэр Саха сирин олохтоохторун дьиктиргэттилэр. Сорохтор маны НЛО-ҕа холоотулар.

Арассыыйа, ол иһигэр Саха сирин олохтоохторо дьикти көстүүнү хаартыскаҕа, видеоҕа устан куйаар ситимигэр киэҥник тарҕаттылар. РФ Күн астрономиятын лабораторията быһаарарынан, спутниктар сотору кэминэн ионнай двигателлэрин холбоон, 500 килэмиэтир үрдүккэ бэйэ-бэйэлэриттэн арахсан, тус-туспа орбиталарыгар тахсыахтара. Ааптар быраабын кэспэт туһуттан, лаборатория маннык көстүү хайдах буоларын көрдөрөр 6 сыллааҕы Европаҕа уһуллубут видеоны тарҕатта.

«Starlink» диэн тугуй?

«Starlink» – космоска интэриниэт ситимин хааччыйар монополист-провайдер. Кини 12 тыһыынчаттан тахса аппараата 550 килэмиэтир үрдүккэ көтөр. Бу көннөрү спутниктардааҕар 65 төгүл намыһах үрдүккэ көтөр буолан, биһиги кинилэри Сиртэн көрөр кыахтанабыт.