Ньурба суута «иноагены» отчуотун туттарбатаҕын иһин ыстарааптаата

 Ньурба оройуонун суута «иноагеннар» реестригэр киирбит олохтоох киһиэхэ сыһыаннаах административнай дьыаланы көрдө.

РФ Юстицияҕа министиэристибэтин  дьаһалынан «иноагеннар» реестригэр киирбит гражданин сокуонунан олохтоммут болдьоххо бу сыл бастакы кыбаарталын отчуотун туттарбатах. Онон РФ Административнай буруйу оҥоруу кодексатын (КоАП РФ) 19.34 ыстатыйатын 2-с чааһын кэспит.

255-ФЗ №-дээх Федеральнай сокуон ирдэбилинэн, «иноагент» биэдэмистибэҕэ үлэтин-хамнаһын туһунан отчуоту булгуччу ыытыахтаах. Бу отчуокка кини үлэтин сүрүн сыала-соруга, үлэлиир сирэ, салалтатын аадырыһа, устаапка уларыйыылар уонна тэрилтэ бырагырааматын хайдах толорорун  туһунан иһитиннэрии киириэхтээх. Отчуоттуур бэрээдэк анал бирикээһинэн 2022 сыллаахха бигэргэтиллибитэ.

Суут дьыалаҕа сыһыаннаах сурукка түспүт дакаастабыллары үөрэтэн баран, олору сөптөөҕүнэн, итэҕэтиилээҕинэн уонна сокуону кэһии чахчы буолбутун туоһулуурунан билиннэ. Докумуоннары хомуйууга ханнык даҕаны сокуону кэһии тахсыбатах. Түмүгүнэн, суут «иноагены» буруйдааҕынан билиннэ уонна киниэхэ 30 000 солкуобай кээмэйдээх административнай ыстараабы төлөтөргө уураахтаата. Суут уурааҕа сокуоннай күүһүгэр киирэ илик диэн Саха Өрөспүүбүлүкэтин сууттарын холбоһуктаах пресс-сулууспата иһитиннэрэр.