Ньурбатааҕы киин балыыһа саҥа эмтиир куорпуһа тутуллар

Ньурбатааҕы киин  балыыһа саҥа эмтиир куорпуһа Ньурба, Сунтаар уонна Үөһээ Бүлүү улуустарын олохтоохторугар тустаах көмөнү оҥоруоҕа. Эбийиэк тутуутун хаамыытын от ыйын 24 күнүгэр Ньурба улууһугар үлэтинэн сырыытын кэмигэр Саха сирин Ил Дархана Айсен Николаев көрдө-иһиттэ. Бүгүҥҥү күҥҥэ куорпус тутуутун бэлэмэ 37%-ҥа тэҥнэһэр.

Ньурбатааҕы киин балыыһа саҥа эмтиир куорпуһа РФ Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын доруобуйа харыстабылын маҥнайгы сүһүөҕүн уларытан тутуу бырагырааматын чэрчитинэн тутуллар. Эбийиэк үлэҕэ киириэҕиттэн манна тымыр ыарыыларын маҥнайгы отделениета, суһал көмө сулууспата, травматология, хирургия, реанимация отделениелара, операционнай блок, экспресс-лаборатория уонна да атын подразделениелар баар буолуохтара.

Саҥа куорпус Саха сирин арҕааҥҥы бөлөх үс улууһун олохтоохторугар анал көмө хаачыстыбатын уонна тиийимтиэтин үрдэтиэҕэ. Эбийиэги көрүү кэмигэр Айсен Николаев тутааччыларга тымныы түһүөн иннинэ инженернай ситимнэри таҥааһыҥҥа киирсэргэ сорудахтаата.

«Тымныы түһүөн иннинэ дьиэ  инженернай ситимнэрин таҥааһыҥҥа киириэххэ наада», — диэтэ өрөспүүбүлүкэ салайааччыта.

Өрөспүүбүлүкэҕэ мэдиссиинэ көмөтүн хаачыстыбатын уонна тиийимтиэтин үрдэтии РФ бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын, ону таһынан Саха сирин Ил Дархана Айсен Николаев «Саха Өрөспүүбүлүкэтигэр дьон доруобуйатын бөҕөргөтүү уонна доруобуйа харыстабылын ситимин сайыннарыы стратегическай хайысхаларын туһунан» стратегическай ыйааҕын чэрчитинэн ыытыллар.

Сиһилии: https://www.sakha.gov.ru/news/57571