ОДьКХ миниистирин солбуйааччыта Сергей Киров «Аҕа дойду иннигэр үтүөлэрин иһин» уордьанынан наҕараадаланна

Арассыыйа Бэрэсидьиэнэ судаарыстыбаннай наҕараадалары туттарар туһунан Ыйаахха илии баттаата. Саха Өрөспүүбүлүкэтин ОДьКХ  миниистирин солбуйааччыта Сергей Киров үлэҕэ ситиһиилэрин уонна өр сыллаах үтүө суобастаах үлэтин иһин II истиэпэннээх «Аҕа дойду иннигэр үтүөлэрин иһин» уордьаҥҥа тигистэ.

Сергей Киров саҥа эрэгийиэннэри чөлүгэр түһэриигэ судаарыстыбаннай сорудаҕы толорууга быһаччы кыттыбыта. Кини салайыытынан шефствоҕа ылыллыбыт сирдэр инфраструктуратын уонна уонунан социальнай эбийиэктэри чөлүгэр түһэрбиттэрэ: элбэх кыбартыыралаах дьиэлэри, мэдиссиинэ тэрилтэлэрин, култуура эбийиэктэрин уонна уулуссаны сырдатар тиһиги. Кировскай уонна Докучаевскай куораттары чөлүгэр түһэриигэ улахан кылаат киллэриллибитэ.

«Маннык хас биирдии эбийиэк кэннигэр — дьон күннээҕи олоҕо, дьиэҕэ төннөр, мэдиссиинискэй көмөнү ылар кыахтара турар», — диэн бэлиэтээтэ Саха сирин Бырабыыталыстыбатын бэрэссэдээтэлин бастакы солбуйааччыта Николай Бочков.

Николай Бочков Сергей Кировы судаарыстыбаннай наҕараадатынан эҕэрдэлээтэ уонна үрдүк профессионализмын, эппиэтинэстээҕин, бэйэтин дьыалатыгар бэриниилээҕин иһин махтанна. Киниэхэ кытаанах доруобуйаны, этэҥҥэ буолууну уонна дьон-сэргэ туһугар үлэтигэр салгыы ситиһиилэри баҕарда.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.

Сиһилии: https://www.sakha.gov.ru/news/67583