Олимпиаданы кытаатыннаран эрэллэр

Билим уонна үрдүк үөрэх  министиэристибэтэ үрдүк үөрэх олимпиадатын биир кэлим эксээмэн курдук кытаанах ирдэбиллээхтик тэрийэн ыытар туһунан этии киллэрбит.

“Биһиги киллэрбит биир этиибитинэн, үрдүк үөрэх олимпиадатын Бүтүн Арассыыйатааҕы үөрэнээччилэр олимпиадаларыгар тэҥнээх ыстандаартынан оҥорон уонна ону биир кэлим эксэмээн курдук кытаанах ирдэбилинэн ыытыы буолар. Маны биир идэлээхтэрбит бары өйүүллэр”, – диэн билим уонна үрдүк үөрэх миниистирэ Валерий Фальков Федерация Сэбиэтин билимҥэ, үөрэххэ итиэннэ култуураҕа кэмитиэтин мунньаҕар эппитин РИА Новости суруйар.

Кини этэринэн, үрдүк үөрэх олимпиадата 83-тэн 60 диэри сарбыллыбыт. Олус элбэх оҕо үөрэххэ олимпиада түмүгүнэн киирэр кыахтанан, быйыл эксээмэҥҥэ үрдүк даҕаны бааллаах оҕолор бүддьүөт миэстэтиттэн көрбүтүнэн маппыттара. Онон дойду үрдүнэн бэрээдэктээһин саҕаламмыт.