Олимпийскай чөмпүйүөн Альберт Батыргазиев: «Холобур буолуохпун баҕарабын»

Бүгүн, муус устар 22 күнүгэр, Саха Өрөспүүбүлүкэтин Физическэй култуураҕа уонна успуорка миниистирин бастакы солбуйааччыта Гаврил Мохначевскай боксаҕа Олимпийскай чөмпүйүөнэ Альберт Батыргазиевы кытта көрүстэ. Күрэсчит Дьокуускайга «Битва за контракт» диэн профессиональнай боксаҕа Бүтүн Арассыыйатааҕы турнир бочуоттаах ыалдьытынан кэллэ.

Көрсүһүүгэ ону тэҥэ өрөспүүбүлүкэтээҕи Бокса федерациятын бэрэссэдээтэлин солбуйааччыта, турниры биир тэрийээччитэ Василий Егоров кытынна. Гаврил Мохначевскай Альберт Батыргазиевка кэлбитин иһин махтанна уонна өрөспүүбүлүкэҕэ бокса хайдах сайдарын туһунан кэпсээтэ.

«Быйыл Саха сирэ бокса 70 сылын бэлиэтиир. Бу сыллар тухары баай устуоруйалаах күүстээх оскуола улаатан таҕыста. Устуоруйаны талааннаах дьон оҥороллор: тириэньэрдэр, күрэсчиттэр, энтузиастар уонна суруналыыстар. Өрөспүүбүлүкэ эдэр күрэсчиттэрэ Олимпийскай оонньуулар боруонса призера Георгий Балакшин уонна Европа икки төгүллээх чөмпүйүөнэ, аан дойду чөмпүйүөнээтин үрүҥ көмүс призера Василий Егоров ситиһиилэрин холобур оҥостоллор. Бүгүн өрөспүүбүлүкэҕэ боксанан 7205 киһи мэлдьи дьарыктанар, оттон кинилэри кытта үрдүкү анал үөрэхтээх 63 исписэлиис үлэлиир. Үгэс быһыытынан Саха сирин официальнай биринчиэстибэлэрэ уонна чөмпүйүөнээттэрэ, любительскай уонна профессиональнай боксаҕа бөдөҥ турнирдар ыытыллаллар», – диэтэ миниистир бастакы солбуйааччыта.

Кини ону тэҥэ сотору кэминэн буолуохтаах улахан стартар тустарынан кэпсээтэ, ол иһигэр бэс ыйын саҥатыгар Дьокуускайга ыытыллыахтаах оҕунан ытыыга Арассыыйа чөмпүйүөнээтин туһунан. Альберт Батыргазиев бэйэтин устуоруйатын кытта үллэһиннэ. Кини кикбоксинтан саҕалаабытын, ол эрээри Арассыыйа национальнай сүүмэрдэммит хамаандатыгар киирэр уонна Олимпийскай чөмпүйүөн буолар баҕалааҕын билиннэ. Боксаҕа көһүүтэ түргэнник үчүгэй түмүктэри аҕалбыт, манна төрөөбүт өрөспүүбүлүкэтин уонна хамаандаҕа бииргэ дьарыктанар табаарыстарын өйөбүллэрэ улахан оруолу оонньообут.

«Мин холобур буолуохпун баҕарабын. Оҕону сөпкө иитиэххин баҕарар буоллаххына, бэйэҕиттэн саҕалаа диэн мээнэҕэ эппэттэр ээ. Мин түөрт бырааттаахпын уонна икки уоллаахпын. Уолум номнуо миигин үтүктэр, сарсыардааҥы эрчиллиини оҥорор. Бырааттарым кыраапыктара чуолкай: күн бастакы аҥаара – үөрэх, иккиһэ – успуорт. Биһиги дьиэ кэргэҥҥэ уопсайа алта уолбут. Аҕабыт үрдүк таһымы туруорбута —  биһиги бары онно дьулуһабыт», – диэн спортсмен кэпсээтэ.

Ыччат успуордунан дьарыктаныахтаах диэн кини бэлиэтээтэ. Бары Олимпийскай чөмпүйүөнүнэн буолбаттар, ол эрээри доруобуйа уонна физическэй хамсаныы киһиэхэ хас биирдиилэригэр наада. Альберт Батыргазиев Ууспуорт министиэристибэтин уонна өрөспүүбүлүкэ салайааччыларыгар боксаны өйүүллэрин уонна чөл олоҕу сырдаталларын иһин махтанна. Көрсүһүү түмүгэр Гаврил Мохначевскай Олимпийскай чөмпүйүөҥҥэ Саха сирин туһунан өйдөбүнньүк «Азия оҕолоро» кинигэни бэлэхтээтэ. Бу туһунан Успуорт министиэристибэтин пресс-сулууспата иһитиннэрэр.