Паром сырыыта: Дьокуускай – Аллараа Бэстээх хайысханан тарыып сыаната хаһан үрдүүрүй?

Алтынньы 23 күнүгэр Дьокуускай – Аллараа Бэстээх хайысханан паромнар штатнай эрэсииминэн үлэлииллэр. Билиҥҥитэ паромнар сайыҥҥы тарыыбынан сылдьаллар. Сыана хаһан үрдүүрэ былааннанарын туһунан  «Саха Сирин паромнара» салайар хампаанньа салайааччыта Николай Ефимов кэпсээтэ.

«Бээтинсэҕэ уонна субуотаҕа сайыҥҥы тарыыбынан үлэлиибит. Ол кэннэ тарыыптары уларытыы туһунан быһаарыы ылыныахпыт. Билиҥҥи туругунан 13 паром үлэлиир. Муус халыҥаан истэҕин аайы, ахсааннара аҕыйаан иһиэ», — диэн иһитиннэрдэ Ефимов.

Бу иннинэ тарыыптар алтынньы 23 күнүттэн үрдүөхтэрэ диэн биллэрбиттэрэ, ол эрээри билиҥҥитэ паром урукку сыананан үлэлиир.

• Барыллаан биллэринэн,  таһаҕас таһар массыынаны туоратыы сыаната 100 тыһыынча солкуобайга диэри үрдүөҕэ.
• Оттон кыра массыынаны туоратыы, массыына көрүҥүттэн тутулуктанан, 5-тэн 15 тыһыынча солкуобайга диэри буолуо.
• Пассажирдары туоратыы тарыыба уларыйыа суоҕа — биир киһиэхэ 350 солкуобайынан хаалыа