Павловскайга оҕолорго аналлаах киин баар буолла

Мэҥэ Хаҥалас улууһугар Павловскайга «Айылгы» норуот айымньытын киинигэр оҕолорго аналлаах саҥа култуурунай-сырдатар киин аанын арыйда.

Бу «Дьиэ кэргэн» национальнай бырайыак көмөтүнэн олоххо киллэриллибит итиэннэ тыа сирин кэнчээри ыччатыгар усулуобуйа тэриллибит. Үөрүүлээх тэрээһиҥҥэ СӨ култууратын уонна духуобунай сайдыытын министиэристибэтиттэн, сэлиэнньэ дьаһалтатыттан, «Айылгы» киин кэлэктиибэ уонна уопсастыбаннас кыттыыны ыллылар.

Үҥкүүнэн дьарыктанар саалаҕа, фойеҕа уонна таҥас уларыттар хоско хапытаалынай өрөмүөннэр ыытыллыбыттар. Оҕолорго анаан саҥа музыкальнай инструменнары атыыласпыттар, күпсүүр, ВИА инструменнара, саҥа миэбэл, уо.д.а. ылыллыбыттар. Онон оҕолор музыканан, ырыанан, үҥкүүнэн дьарыктаналларыгар наадалаах барыта баар буолбут.

Манна даҕатан, бу оҕолор кииннэрэ тэриллибит сүрүн дьиэтэ 1982 сыллаахха Ленин сопхуос күүһүнэн, үбүнэн-харчытынан тутуллубутун ыйаллар. Урут үлэлээбит култуура бэтэрээннэрин истиҥник саныыллар, махтаналлар. Кинилэр ортолоругар Евдокия Федотовна Кычкина, «Төрүт» фольклор ансаамбылын салайааччыта, ону сэргэ дириэктэрдэр уонна уус-уран салайааччылар: Зоя Васильевна Шарина, Наталия Ивановна Старостина, Виктория Васильевна Николаева ааттарынан киэн тутталлар. Култуура үлэтэ сайдарыгар  Аркадий Михайлович Новиков, Василий Кривошапкин — Эллэй, уо.д.а. сүдү кылааттарын киллэрбиттэрин бэлиэтииллэр.

Тэрилтэ айар үлэтин көхтөөхтүк, тэтимнээхтик салгыыр. Билигин манна уопсайа 29 араас кулууп, 12 уопсастыбаннай түмсүү ситиһиилээхтик үлэлииллэр. «Оҕолорго аналлаах саҥа киин болҕомтону тардыаҕа», — диэн СӨ култууратын уонна духуобунай сайдыытын миниистирэ Афанасий Ноев этэр.

СӨ култууратын министиэристибэтин пресс-сулууспата

Сиһилии: https://minkult.sakha.gov.ru/news/66085